Кинескиот производител на автомобили „BYD“ објави дека нивниот модел „Yangwang U9 Track Edition“ постигнал максимална брзина од 472,41 km/h на тестирање во Германија.
Ова значи дека „BYD Yangwang U9 Track Edition“ стана најбрзото електрично возило на светот.
Тестот, како што наведува кинескиот бренд, бил одржан на 8 август во просториите на „ATP Automotive Testing Papenburg“, а зад воланот бил професионалниот возач Марк Басенг. Претходниот рекорд го држеше „Rimac Nevera R“, кој во јули 2025 година постигна брзина од 431,45 km/h.
Моделот „Track Edition“ е опремен со четири електрични мотори, од кои секој генерира максимална моќност од 744 коњски сили.
Според наводите на „BYD“, комбинираната сила е поголема од 2.960 коњски сили, што резултира со импресивен однос на сила и тежина од 1.200 коњски сили по тон. За споредба, „Nevera R“ има 1.989 коњски сили и однос од 978 коњски сили по тон.
За да се контролира целата таа моќ, ова електрично возило користи напредни можности за насочување на вртежниот момент, како и „e4 Platform’s DiSus-X“ интелигентниот систем за контрола на каросеријата, кој автоматски ја прилагодува суспензијата за максимално прилепување.
Исто така, се наведува дека возилото користи „првата масовно произведена 1200 V ултра-високонапонска платформа за автомобили, спарена со систем за термално управување оптимизиран за екстремни услови“.
