Германскиот неделник "Zeit" пишува: „Германската влада побара од српската влада објаснување во врска со нападите врз демонстрантите и новинарите во контекст на протестите. Со оглед на тоа што Србија е кандидат за членство во ЕУ, таа се ’обврза на почитување на начелата на владеење на правото‘, изјави портпарол на Министерството за надворешни работи во Берлин. Заменикот на портпаролот на германската влада Штефен Маер додаде: ’Многу внимателно ја следиме ситуацијата‘. Тој ги отфрли обвинувањата дека Германија, поради економски интереси, ги игнорира демократските дефицити во Србија, нагласувајќи дека нема ни збор за ’вртење на главата на другата страна‘. Во позадина на тие обвинувања стои заедничкиот план на Србија и ЕУ за експлоатација на литиум во Јадарската долина, пишува „Deutsche Welle“.“

"Zeit" дополнува: „Минатата недела протестното движење повторно беше видливо присутно на улиците. Големи протести се одржаа во главниот град Белград, но и во Нови Сад и Ваљево. Бројни луѓе беа уапсени и повредени. Полицијата е обвинета за примена на прекумерна сила, а демонстрантите кои ја критикуваат власта постојано ги напаѓаат делумно маскирани приврзаници на власта.“

„Притисок врз вработени за учество на протестите на СНС“

Австрискиот "Standard" пренесува дека, по повеќемесечните масовни протести против „системот на Вучиќ“, партијата на претседателот сега организирала сопствени митинзи во повеќе градови. „Според извештаите на телевизијата „N1“, на протестите, покрај локални функционери на СНС, биле забележани и вработени во јавните служби. Критички настроените медиуми тврдат дека врз тие луѓе постојано се вршел притисок да учествуваат на собирите на СНС“, наведува "Standard".

Левичарскиот дневник "Junge Welt" пишува: „Минатата недела илјадници луѓе повторно излегоа на улиците ширум земјата. Се протестираше против полициската репресија во тие денови. На социјалните мрежи кружат снимки на кои се гледа брутално постапување на полицијата со демонстрантите – униформирани лица кои со палки удираат луѓе додека лежат на земја. Посебен бес предизвика случајот на Николина Синѓелиќ. Младата жена тврди дека еден полициски офицер ѝ се заканил со силување по апсењето во Белград на 14 август. Дополнително, полицајците ја тепале неа и други уапсени. Тоа го потврдуваат и други сведоштва и видеозаписи, кои јасно упатуваат на незаконско постапување на полицијата кон демонстрантите.“

"Junge Welt" додава: „СНС се обидува да освојува поени и надвор од улицата. Претседателот Вучиќ во средата во Белград најави дека во недела ќе ги претстави мерките за поддршка на граѓаните. Од нив наводно најмногу ќе имаат корист најсиромашните и пензионерите, уште од 1 септември. Така, на пример, граѓаните побрзо би добивале поволни кредити. Вучиќ истовремено најави промена на тактиката кон протестите, што може да се протолкува како закана до демонстрантите.“

„Фон дер Лајен не се изјасни за случувањата во Србија“

Истото издание нагласува дека „либералната опозиција во земјата истовремено се обидува да ја сврти Европската унија против Вучиќ“. Во писмо до функционери на ЕУ и претседателката на Европската комисија Урсула фон дер Лајен, Зелено-левиот фронт и Движењето на слободни граѓани бараат од Унијата итна реакција на случувањата во Србија, осуда на полициското насилство, воведување санкции, забрани за патувања и замрзнување на имотот на српските политичари, вклучувајќи го и Вучиќ. „Таквите беспомошни апели му одат во прилог на СНС, кој во протестите гледа обид за уривање на власта диригиран од странство. Тоа го нагласи и рускиот амбасадор во Србија, Александар Боцан-Харченко, кој според српските медиуми за телевизијата „Rusija 24“ изјави дека властите сè уште ја контролираат ситуацијата во Србија, но дека состојбата добива карактеристики на обоена револуција.“

"Junge Welt" заклучува: „Фон дер Лајен сè уште не се изјаснила за настаните во Србија. Веројатно и затоа што токму за време на мандатот на Вучиќ српската војска одржа најмногу заеднички вежби со НАТО, а Вучиќ го продаде литиумот на својата земја на германската автомобилска индустрија. Дополнително, Србија – и покрај негодувањето на Москва – сè уште испорачува оружје на Украина. Србија го снабдува и Израел. Неделава беше откриено дека Белград склучил договор вреден 1,65 милијарди долари со израелскиот производител на дронови „Elbit Systems“.“