Рафаел Леао ќе ја бара својата најдобра форма во сезоната во која нов тренер е Макс Алегри, но истовремено ќе има и далеку поголеми одговорности во тим кој претрпе доста промени ова лето.
До оваа фаза од месец август, Милан претстави шест летни засилувања и последното беше Ардон Јашари, но откако беше комплетиран средниот ред, се очекува „росонерите“ да добијат и едно звучно име во нападот до крајот на преодниот рок.
Медиумите на големо шпекулираа за Душан Влаховиќ и оваа зделка никако да се реализира, па во ситуација кога се зборува за нов напаѓач на Милан, доста интересен е ставот кој го изнесе Рафа Леао.
Крилниот фудбалер смета дека идеален партнер за него во нападот би бил Моизе Кин од Фиорентина, а тоа го посочи во преписка со фудбалските фанови на чии прашања одговараше на социјалните мрежи.
– Тоа би било лудо. Го посакувам Моизе за Милан. Го обожавам Моизе, тој е мој брат и заедно би ги урнале сите. Тоа би било навистина лудо, – вели Леао.
