Иако неговата претседателска функција ќе му обезбеди имунитет од кривично гонење, тоа не ја стивна буката околу низата скандали што излегоа на виделина пред изборите на 1 јуни оваа година, на кои Навроцки победи со 50,98 отсто од гласовите. Контроверзиите се движат од бизарно користење на алтер его на писател на криминалистички романи и самофалење, до сериозни обвинувања за поврзаност со гангстери и проституција во луксузен хотел.

Поранешниот претседател Лех Валенса, добитник на Нобеловата награда за мир, изјави дека одбива да присуствува на „срамотниот спектакл“ на инаугурацијата на Навроцки. Во продолжение, „Politico“ дава преглед на најспорните афери што најверојатно ќе го следат новиот претседател на Полска, важна членка на „НАТО“ и петта земја по население во „ЕУ“.

Истрага за стан

Обвинителите започнаа кривична истрага за тоа дали постар маж, идентификуван само како Јежи Ж, бил измамен да ја пренесе сопственоста на својот стан во Гдањск помеѓу 2012 и 2017 година. Иако обвинителите директно не го именуваат Навроцки, тие ги истражуваат околностите под кои тој го стекнал имотот.

Истрагата следуваше по три формални пријави, вклучително и една од градоначалничката на Гдањск, Александра Дулкевич. Во фокусот е сомнежот дека Јежи Ж бил измамен да ја пренесе сопственоста на имотот вреден 28.000 евра во замена за ветувања за „грижа и помош во секојдневниот живот“.

За ваква измама е предвидена казна од шест месеци до осум години затвор, но Навроцки, како претседател на државата, ужива имунитет и одговара само пред специјален суд. Тој, пак, инсистира дека не направил ништо лошо.

„Имам бројни сведоци кои можат да потврдат дека му нудев помош на господин Јежи, обезбедувајќи му финансиска поддршка и извршувајќи обврски во негово име“, изјави Навроцки за „Wirtualna Polska“: „Гледајќи ве право во очи како избран претседател, можам да кажам: ’Немам од што да се срамам‘.“

Негирање за подведување

Најтешкото обвинување, изнесено и од премиерот Доналд Туск, е дека Навроцки бил вклучен во подведување во луксузен хотел во одморалиштето Сопот. Туск го обвини раководството на партијата „Право и правда“ (PiS), која го поддржа Навроцки, дека знае „за врските со гангстери, за ’договарање девојки‘, за измамата со станот и други скриени работи“.

Порталот „Onet“ објави сведоштва дека Навроцки договарал проститутки за гостите во хотелот каде работел како обезбедување, земајќи дел од заработката за себе. Навроцки го тужеше „Onet“, но не по забрзана постапка, што значи дека решавањето на случајот најверојатно ќе трае со месеци, ако не и со години.

На прашањето дали обвинувањата се лажни, новиот претседател на Полска одговори: „Апсолутно. Бев клеветен. Мојата работа беше да обезбедам сигурност и заштита на гостите, а што прават тие за забава, тоа е нивна работа“.

Фудбалско хулиганство

Навроцки призна дека во 2009 година, на возраст од 26 години, учествувал во договорена тепачка меѓу хулигани на ривалски фудбалски клубови. Тепачката, која ја нарече „спаринг“, беше истражувана од полицијата, а некои од учесниците имале криминално минато.

За време на кампањата, Навроцки го прифати имиџот на борец, велејќи дека учествувал во „спортски, благородни борби“ и дека не го преиспитувал минатото на своите спаринг-партнери. Подоцна призна дека претерал нарекувајќи ги тепачките „благородни“.

Станови во музејот и исчезнати албуми

Уште едно обвинување се однесува на неговото користење станови во Музејот на Втората светска војна во Гдањск додека бил директор од 2017 до 2021 година. Според пишувањето на „Gazeta Wyborcza“, Навроцки шест месеци престојувал во луксузен апартман во рамките на музејскиот комплекс, иако живее само пет километри подалеку, и за тоа не платил.

Обвинителството истражува дали со тоа го оштетил музејот за околу 28.000 евра. Навроцки се брани дека престојувал таму за време на карантинот поради коронавирусот и за службени состаноци. Во тек е и друга истрага за исчезнувањето на 8.000 историски албуми од музејот за време на неговиот мандат, со што е предизвикана штета од најмалку 46.000 евра.

Алтер его

Во сферата на бизарното спаѓа интервју од 2018 година за локалната подружница на „TVP“. Во него, писателот Тадеуш Батир, кој истражува за врски со полското подземје, ја пофали книгата на Карол Навроцки. Подоцна се откри дека Батир всушност бил самиот Навроцки, со заматено лице и изменет глас. Навроцки се бранеше со тврдењето: „Книжевните псевдоними не се ништо ново во полското новинарство, литература и академската заедница“.