Португалија обвиена во црно: Загубивме двајца шампиони

Диого Жота и неговиот помал брат Андре ги загубија животите во страшна сообраќајна несреќа рано утрово на шпанска територија, откако автомобилот во кој се превезувале излетал од автопатот и се запалил заедно со околната вегетација која била во близина на немилиот настан.

Ѕвездата на Ливерпул (28 години) и неговиот две години помлад брат Андре ја завија во црно цела португалска спортска сцена, а сосема очекувано, првото соопштение пристигна од Португалската Фудбалска Федерација.

– Португалската фудбалска Федерација и целата португалска фудбалска заедница се целосно скршени по веста за смртта на Диого Жота и неговиот брат Андре Силва рано утрово во Шпанија.

– Со речиси 50 настапи за националната селекција, Диого Жота беже извонредна личност која беше почитувана од сите негови соиграчи и противници, тој претставуваше симбол за човек кој е пример за сите останати.

– Португалската фудбалска федерација изразува најдлабоко сочувство до семејството и пријателите на Диого и Андре Силва, како и до ФК Ливерпул и ФК Пенафиел, клубовите каде што играа двајцата.

– Португалската фудбалска федерација веќе побара од УЕФА едноминутно молчење овој четврток, пред натпреварот на нашата репрезентација против Шпанија, на Европското првенство за жени.

– Загубивме двајца шампиони. Смртта на Диого и Андре Силва претставува непоправлива загуба за португалскиот фудбал и ние ќе направиме сè што можеме за да го почитуваме нивното наследство секој ден, – гласи објавата на Португалската Федерација.