Американски конгресмен го номинираше претседателот Доналд Трамп за Нобелова награда за мир откако тој посредуваше во договорот за прекин на огнот меѓу Израел и Иран, објави Fox News.
Претставникот Бади Картер од Џорџија му пиша на Нобеловиот комитет дека Трамп одиграл „извонредна и историска улога“ во завршувањето на „вооружениот конфликт меѓу Израел и Иран и спречувањето на најголемиот државен спонзор на тероризмот во светот да се здобие со најсмртоносното оружје на планетата“.
Трамп го прогласи крајот на „12-дневната војна“ доцна вчера, а прекинот на огнот стапи на сила утрово. Со ова заврши конфликтот што траеше нешто повеќе од една недела, откако Израел првпат започна напад врз Иран, тврдејќи дека Техеран е опасно блиску до стекнување нуклеарно оружје.
Потоа двете земји разменија ракетни напади со денови, а во текот на викендот САД извршија воздушни напади врз три клучни ирански нуклеарни објекти. Иран одговори со испукување ракети врз американската воздухопловна база во Катар вчера, но однапред ги извести американските и катарските претставници за нападот и немаше жртви.
„Влијанието на претседателот Трамп беше клучно за постигнување брз договор за кој многумина веруваа дека е невозможен. Трамп, исто така, презеде смели и решителни чекори за да ги запре нуклеарните амбиции на Иран и да осигури дека најголемиот спонзор на тероризам во светот не може да добие нуклеарно оружје“, напиша Картер во своето писмо.
Картер изјави дека лидерството на Трамп за време на кризата „ги отелотворува токму идеалите што Нобеловата награда за мир се стреми да ги признае: стремежот кон мир, спречувањето на војната и промовирањето на меѓународната хармонија. „Во регион обележан со историски непријателства и политичка нестабилност, таков пробив бара и храброст и јасност“.
Пред три дена, Пакистан објави на социјалната мрежа X дека американскиот претседател Доналд Трамп треба да ја добие Нобеловата награда за мир во 2026 година „како признание за неговата решителна дипломатска интервенција и клучна лидерска улога за време на неодамнешната криза меѓу Индија и Пакистан“.
Трамп долго време тврдеше дека одиграл клучна улога во деескалацијата на конфликтот, и покрај упорните негирања од страна на индиските власти.
