Најмалку пет жртви во руски напад врз Киев, луѓето се кријат во метро станици, нападнати станбени објекти

Во нападите оштетен е и влезот во метро станицата што служеше како засолниште, соопштија денес украинските власти.

„Рускиот стил е непроменет – удар таму каде што може да има луѓе“, објави Тимур Ткаченко, началник на воената администрација во Киев, на Телеграм.

Русија не коментираше за нападите. Двете страни негираат дека таргетирале цивили во војната што Русија ја започна во февруари 2022 година, но илјадници цивили се убиени во конфликтот, од кои огромното мнозинство се Украинци.

Најмалку четири лица беа убиени во прометниот кварт Шевченкивски во Киев, каде што беше уништен целиот влез во станбен облакодер, изјави украинскиот министер за внатрешни работи Ихор Клименко на Телеграм.

„Сè уште има луѓе под урнатините“, напиша тој.

Нападот предизвика штета во шест од десет градски области, вклучувајќи неколку станбени згради, а повреди најмалку 10 лица, рече Клименко.

Шеесет и осумгодишна жена е убиена, а најмалку осум лица се повредени во нападот врз поширокиот регион Киев околу украинскиот главен град, изјави гувернерот Микола Калашник на Телеграм.

Фотографиите објавени од Државната служба за вонредни ситуации на Украина покажуваат спасувачи како водат луѓе на безбедно место од неколку запалени згради и објекти во темница. Службата соопшти дека меѓу спасените е и бремена жена.
Излезот од метро станицата во киевската област Свјатошински, исто така, е оштетен, како и блиската автобуска станица, соопштија властите во Киев.

Станиците на метрото во Киев се користат како едни од најбезбедните засолништа од бомби во градот за време на војната.

Во најсмртоносниот напад на Русија врз Киев минатата недела загинаа 28 лица, а повеќе од 150 беа повредени. Украинските власти велат дека речиси 30 локации биле погодени за време на нападот.