Според сириската државна новинска агенција, напаѓачот детонирал експлозивен појас во црквата, во која како што пренесе агенцијата во тој момент имало околу 400 луѓе.

Локалните извори велат дека безбедносните сили брзо го затвориле подрачјето, ги евакуирале ранетите и мртвите и поставиле безбедносен кордон околу местото на нападот.

Според безбедносните извори, најмалку 15 лица загинале, а преживеаните во паника лелекале, додека една жена паднала на колена и почнала да плаче. Фотографијата објавена од сирискиот државен медиум САНА покажува црковни клупи покриени со рушевини и крв.

Ниту една група веднаш не ја презеде одговорноста за нападот, но Министерството за внатрешни работи на Сирија објави дека екстремист на Исламска држава влегол во црквата, пукал во присутните, а потоа се разнел со експлозив, што потврдија и сведоци.

„Влезе во црквата и се разнесе“

Сведок, кој се претставил како Равад, за Асошиејтед Прес изјави дека го видел напаѓачот, кој бил придружуван од уште две лица кои избегале додека тој возел во близина на црквата.

„Пукаше пред црквата... потоа влезе во црквата и се разнесе“, рече тој.

Сириски министер: Тоа е кукавички чин

Сирискиот министер за информирање Хамза Мостафа го осуди нападот, нарекувајќи го терористички.

„Овој кукавички чин е спротивен на граѓанските вредности што нè обединуваат“, напиша тој на социјалната мрежа Икс,

„Нема да отстапиме од нашата посветеност на еднакво граѓанство... исто така, го потврдуваме ветувањето на државата да вложи максимални напори во борбата против криминалните организации и да го заштити општеството од сите напади што ја загрозуваат неговата безбедност“, додаде тој.