Иранскиот министер за надворешни работи Абас Аракчи денес изјави дека Иран е подготвен да ги запре нападите врз Израел, доколку Тел Авив ја прекине офанзивата врз Техеран.

Обраќајќи се пред странските амбасадори во Техеран, Аракчи нагласи дека војната му е наметната на Иран, и дека Техеран немал друг избор освен да одговори.

„Нашата одбрана е целосно легитимна и ќе биде спроведена решително, исклучиво како одговор на агресија. Ако нападите престанат, ќе престанат и иранските одмазди“, порача тој.

Напнатоста меѓу Иран и Израел нагло ескалираше откако Израел во петокот изведе координирани воздушни напади врз повеќе локации во Техеран, вклучително и воени и нуклеарни цели, што доведе до ирански контраудар само неколку часа подоцна.

„Имаме докази дека Американците помогнале во нападите“

Синоќа, Иран започна втор бран операции, насочени пред сè кон економски и индустриски цели во израелскиот пристанишен град Хаифа. Паралелно со тоа, израелски удари ги погодиле иранското министерство за одбрана и складишта на нафта во Техеран.

Според иранските власти, првиот ден од израелскиот напад загинале 78 лица, а десетици, меѓу кои и деца, се убиени вториот ден.

Овој нов бран насилство доведе до прекин на индиректните нуклеарни преговори помеѓу Иран и САД, кои се одвиваа со посредство на Оман. Шестата рунда преговори требаше да се одржи во недела во Мускат.

Аракчи изјави дека израелската агресија не би била можна без координација и поддршка од САД, наведувајќи го тоа како клучна причина за прекин на преговорите.

Тој рече дека Иран располага со цврсти и уверливи докази дека американските сили и бази во регионот дале поддршка за израелските напади.

„Израел систематски ги саботира нуклеарните преговори“

Министерот го спомена и актуелниот американски претседател Доналд Трамп, кој, според него, изјавил дека „овие напади не би биле можни без американска опрема“ и најавил „следни фази“ – што, како што рече Аракчи, се дополнителни докази за американска вмешаност.

Во врска со негирањата од страна на САД за вмешаност во нападот на нуклеарниот објект Натанз во провинцијата Исфахан, Аракчи порача дека Иран не ги прифаќа таквите деманти поради противречните докази.

„Ако САД навистина не се вмешани, тогаш мора тоа јасно и јавно да го осудат“, нагласи тој, додавајќи дека приватните пораки не се доволни. Тој ја повика и меѓународната заедница да ги препознае прекршувањата на меѓународното право од страна на Израел.

Аракчи го обвини Израел за систематско саботирање на нуклеарните преговори, потсетувајќи на саботажата во објектот за збогатување ураниум во Натанз во 2020 година, во текот на преговорите во Виена за обновување на нуклеарниот договор од 2015 година. Тогаш, Иран реагираше со зголемување на обогатувањето на ураниумот на 60 отсто и со заменување на оштетените центрифуги со напредни модели.

Министерот истакна дека, и покрај провокациите, Иран пристапил на преговорите со САД со добра волја, одржувајќи пет рунди разговори и подготвувајќи контрапредлог со цел постигнување договор.

Сепак, тој повтори дека Израел останува против било каков нуклеарен договор и активно работи на опструкција на дипломатијата.

На крајот, Аракчи истакна дека Иран официјално побарал од Меѓународната агенција за атомска енергија (МААЕ) итно свикување вонредна седница за да се разговара за најновиот израелски напад врз Натанз, оценувајќи го како црвена линија на меѓународното право која Израел сега ја има преминато.