Манчестер Сити работи со забрзано темпо и сака да го засили тимот со неколку фудбалери пред стартот на Светското клупско првенство, па така во период од 48 часа го потврди и третото засилување.
По голманот Маркус Бетинели од Челси и левиот бек Рајан Аит Нути од Вулверхемптон, Манчестер Сити денеска го потврди и највозбудливиот фудбалер за кој се говореше во последно време, Рајан Шерки.
Новопечениот француски репрезентативец блесна на дебито за националниот тим и само потврди зошто е будно следен од Пеп Гвардиола, тренер кој сега добива магија плус во нападот.
Шерки има огромен потенцијал и стави потпис на петгодишен договор, а постигнат е договор со Лион да биде ослободен и за настап на Светското клупско првенство.
Трансферот го чини Сити фиксни 36 милиони евра, со тоа што со одредени бонуси истиот може да достигне и 42 милиони евра.
