Светското првенство во 2026 година ќе биде првиот Мундијал во историјата на кој ќе учествуваат 48 репрезентации. Во речиси сите делови од светот сè уште се одвиваат квалификациите за натпреварувањето што ќе се одржи во Соединетите Американски Држави, Канада и Мексико. Еве како ќе изгледа досега најголемото Светско првенство во историјата.
48 репрезентации, 12 групи, 32 продолжуваат понатаму
Иако првичните планови предвидуваа систем на натпреварување со 16 групи од по три репрезентации, одлучено е тимовите да бидат распоредени во 12 групи со по четири репрезентации. Од оваа страна, ништо не е променето во однос на досегашните формати, освен што е зголемен бројот на групи.
Сепак, се менува бројот на репрезентации што продолжуваат понатаму. Како и досега, првите две од секоја група ќе се пласираат во нокаут-фазата, но ќе им се придружат и осум од 12-те најдобри треторангирани репрезентации. Ваквиот систем потсетува на оној што го имаме на Европските првенства и ќе резултира со тоа нокаут-фазата да започне од шеснаесетина финале, наместо од осмина финале, како што беше досега. Репрезентациите на патот до финалето ќе мора да одиграат еден натпревар повеќе.
Како се одредуваат групите?
Ждребот за групите ќе се одржи во декември 2025 година, кога ќе бидат познати сите учесници. Тимовите ќе бидат распоредени во четири групи врз основа на рангирањето на ФИФА, со тоа што трите домаќини имаат загарантирано место во првата група.
Исто така, треба да се спомене дека шесте репрезентации што ќе се квалификуваат за Светското првенство преку дополнителни квалификации ќе бидат сместени во последната група, без оглед на нивниот пласман на ранг-листата на ФИФА.
Каде се игра првенството?
Најголемиот дел од натпреварите ќе се играат во Соединетите Американски Држави, кои обезбедуваат 11 од вкупно 16 градови-домаќини. Мексико обезбедува три, а Канада два града. Сите натпревари од четвртфиналето натаму ќе се играат во САД.
Првенството започнува на 11 јуни 2026 година и ќе трае до 19 јули, кога ќе се одигра финалето во Њујорк на стадионот МетЛајф, кој има капацитет од 82.500 гледачи.
Кои веќе се квалификуваа?
Веќе се познати 10 репрезентации што ќе учествуваат на Светското првенство. Покрај трите домаќини, тука се и пет азиски репрезентации, како и по една од Јужна Америка и Океанија. Тоа се:
• САД
• Канада
• Мексико
• Иран
• Јапонија
• Јордан
• Јужна Кореја
• Узбекистан
• Аргентина
• Нов Зеланд
Од Европа ќе пристигнат 16 репрезентации, од Африка девет, од Јужна Америка уште пет, а од Северна Америка и Азија уште по три. Последните две репрезентации ќе дојдат од меѓуконтиненталните дополнителни квалификации, во кои ќе учествуваат две северноамерикански репрезентации и по една од Јужна Америка, Азија, Африка и Океанија (Нова Каледонија).
