Макрон и Мелони се ракувале и бакнале во образ моментот кога се сретнале. Потоа насмеано позирале за фотографите. „Дали навистина беше политичка средба?“, се шегуваат луѓето на социјалните мрежи. Некои напишаа дека е очигледно дека „Макрон е импресиониран од италијанската премиерка“.

Макрон предложи средба

Да потсетиме, Мелони признала дека има несогласувања со Макрон, но негирала дека имала било какви „лични проблеми“ со него и изразила надеж за изградба на нови темели за соработка меѓу Рим и Париз. Токму Макрон ја предложи посетата, според француски извори, „бидејќи неговата улога е да ги зближи Европејците, а тој исто така сака да соработува со неа“.

Средбата се случи само неколку недели откако беа откриени затегнатите односи меѓу двајцата на самитот на европските лидери во Албанија на 16 мај. Мелони беше во Тирана, но впечатливо беше отсутна од средбата меѓу Макрон и лидерите на Германија, Велика Британија и Полска со украинскиот претседател Володимир Зеленски, по што следеше заеднички повик до американскиот претседател Доналд Трамп.

Мелони рече дека не им се придружила затоа што се противи на идејата за испраќање италијански сили во Украина за наметнување мир во војната со Русија. Макрон подоцна рече дека Италијанката дејствувала под влијание на „недоразбирање“.

Тензии постојат веќе три години

Постојат тензии меѓу Париз и Рим откако Мелони ја презеде власта во октомври 2022 година, вклучително судир околу миграцијата и уште еден на самитот на Г7 во Италија минатата година околу правото на абортус. Но, втората и третата по големина економија на Европската унија се соочуваат со слични предизвици од војната во Украина и сеопфатните царини на Трамп против блокот.