Беспилотни летала нападнаа фабрика за беспилотни летала во градот Дубна, во Московската област, објавија руските канали на Телеграм „Астра“ и „База“, повикувајќи се на локалните жители. Нападот го потврдија градоначалникот на Москва, Сергеј Собјанин, и руското Министерство за одбрана.
На социјалните мрежи беа објавени видеа на кои се гледаат беспилотни летала над Дубна, како и експлозија и пожар по ударот. На снимките може да се чуе и дека жителите коментираат: „Повторно е погоден Кронштат“.
Според информациите на официјалната веб-страница на компанијата Кронштат, таа развива „беспилотни летала и опрема за воздухопловство“.
Од утрото, градоначалникот Собјанин објави дури 17 пораки за нападот со беспилотни летала. Според него, руската воздушна одбрана соборила најмалку 31 беспилотно летало што летале кон Москва.
Тој, исто така, објави дека нападот со беспилотни летала над Зеленоград бил одбиен. Според неговите изјави, во Москва и Зеленоград немало „сериозни штети или жртви“, а службите за итни случаи работат на терен за санирање на местото каде што паднале остатоците.
По нападот избувнал пожар во Зеленоград, објави Телеграм каналот База.
Дубна, позната како „град на науката“, се наоѓа 121 километар северно од Москва.
