Двајца вработени во израелската амбасада се убиени во пукотница за време на настан во Музејот на еврејско наследство во Вашингтон.
Маж и жена, млад пар кои требало да се свршат, беа застрелани во областа во северозападниот дел на градот, во близина на музеј. Напаѓачот е идентификуван како Елијас Родригез, 30, од Чикаго, кој, според полицијата, по апсењето извикувал „слобода за Палестина“.
„Двајца вработени во израелската амбасада беа бесмислено убиени вечерва во близина на Еврејскиот музеј во Вашингтон“, напиша министерката за внатрешна
безбедност Кристи Ноем во објава на Икс.
Директорот на ФБИ, Кеш Пател, изјави дека тој и неговиот тим биле известени за пукањето.
„Додека работиме со Одделот на метрополитенската полиција за да одговориме и да дознаеме повеќе, ве молиме молете се за жртвите и нивните семејства“, напиша тој на Икс.
Генералниот обвинител Пам Бонди и американската обвинителка за округот Колумбија, Џанин Пиро, беа на местото на пукањето.
Памела Смит, шефицата на Метрополитенската полиција, изјави дека е уапсен осомничен во врска со пукањето во близина на Еврејскиот музеј, во кое беа убиени две лица.
„Прелиминарната истрага покажува дека дветежртви си заминувале од настан во Еврејскиот музеј кога се случила пукотницата“, рече Смит.
„Веруваме дека пукањето го извршил еден осомничен кој сега е уапсен. Пред пукањето, осомничениот бил виден како нервозно оди надвор од музејот.“
Смит рече дека осомничениот „се приближил до група од четири лица, извадил пиштол и отворил оган, погодувајќи двајца кои подоцна починале“.
По пукањето, Смит рече дека осомничениот влегол во музејот, каде што бил приведен од обезбедувањето на настанот.
Осомничениот, според Смит, извикувал „Слобода за Палестина“ додека бил во притвор.
