„Ла Стампа“: Клоп пред сензационална авантура во Серија А

Легендарниот Раниери планира да остане советник на Рома по крајот на оваа сезона и всушност тој има јасни задолженија во пронаоѓањето на новиот тренер, а последната вест која пристигнува од Италија е навистина сензационална.

Рома се поврзуваше со неколку имиња во изминатите неколку месеци, но сега реномираната „Ла Стампа“ информира дека семејството Фридкин во неделата постигнало договор со еден од најелитните менаџери кои се слободни во светот.

Според информациите на медиумот, Јирген Клоп му кажал „Да“ на Дан Фридкин на средбата која се одржала на крајот на изминатиот викенд, односно прифатил да биде лидер на возбудлив проект во кој ќе има и доста промени во играчкиот кадар.

„Ла Стампа“ информира дека договорот меѓу двете страни е веќе постигнат и дека Германецот е подготвен да се врати на клупата како тренер, особено откако сфатил дека му недостасуваат секојдневните обврски во фудбалот и тренинзите со фудбалерите.

Клоп веќе некое време ја извршува функцијата на глобален директор за фудбал на групацијата „Ред Бул“, но во последно време се погласни се шпекулациите дека ќе се врати на старите навики и дека набрзо ќе се впушти во нов тренерски предизвик, што според Италијанците е Рома.

Пред само два месеци, Јирген мораше да ги демантира информациите кои сензационално го поврзуваа со Реал Мадрид и Бразил, а дали ќе биде така и овојпат останува да видиме.