Поранешниот уругвајски претседател Хозе Мухика, познат како Пепе, има рак на хранопроводот и е во терминална фаза на болеста.
Тој е на палијативна нега како не би трпел болки, изјавила вчера неговата сопруга за извесен локален медиум.
Во јануари, 89-годишниот претседател, икона на левицата во Латинска Америка, открил дека неговиот рак, дијагностициран во мај 2024 година, се проширил и дека неговото старо тело повеќе не може да ги издржи третманите.
„Ракот на Хозе Мухика е во терминална фаза“, изјавила неговата сопруга, поранешната потпретседателка Лусија Тополански, во разговор за Радио Саранди објавено вчера.
Додала дека прави сè што е можно како би нејзиниот сопруг успее да ги живее последните денови – најдобро што може.
Отсуството на поранешниот лидер на Уругвај (2010-2015) било забележливо за време на регионалните избори одржани во неделата, по што левицата ја задржа власта во главниот град Монтевидео.
Во неделата, актуелниот претседател Јаманду Орси, штитеник на Мухика, повика да се почитува приватноста на поранешниот герилец.
„Треба сите да водиме сметка дека во секоја етапа од нашиот живот достоинството треба да биде клучно. Не треба да го вознемируваме, треба да го оставиме на мир“, порачал тој.
За време на неговиот мандат како шеф на Уругвај, мала јужноамериканска земја со 3,4 милиони жители, сместена меѓу Бразил и Аргентина, живеел скромно.
Застапник на едноставноста и штедливоста, тој одбил да живее во претседателската палата, возел стара Фолксваген „буба“ и претпочитал да остане на својата скромна фарма во близина на Монтевидео.
Популарноста ја стекнал поради неговиот директен и искрен говор, често без влакна на јазикот.
Бил поборник за многу прогресивни мерки за Латинска Америка, вклучително и легализацијата на канабисот во 2013 година – првпат во светот, како и легализацијата на абортусот и хомосексуалните бракови.
Бидејќи речиси целата негова претседателска плата одела за програми за социјално домување, тој се стекнал со прекарот „најсиромашниот претседател на светот“.
Денес
