Полска компанија претстави летечко возило што потсетува на таканаречениот "speeder bike" од популарната научнофантастична франшиза. Нивниот летечки мотоцикл, интересно, воопшто не користи пропелери за лет.

Млазен мотор, без пропелери

"Volonaut", компанија основана од полскиот иноватор Томаш Патан, го претстави млазниот "AirBike", за кој тврдат дека е првиот "hoverbike" од ваков вид. Возилото користи млазен погон и сопствен систем за стабилизација кој, со помош на летечки компјутер, овозможува автоматско лебдење и лесно управување.

За разлика од вообичаените дизајни со повеќе ротори, "AirBike" користи млазни гасови за создавање сила закревање. Овој револуционерен пристап има многу сличности со леталата од „Војна на ѕвездите“, истакнуваат од "Volonaut", а пренесува "Daily Mail". Во видеата објавени на интернет, возачот мавта додека "AirBike" мирно лебди – визуелна потврда за неговата стабилност.

Изработен од карбонски влакна, "AirBike" е седум пати полесен од обичен мотоцикл. Возилото неодамна излезе од фазата на тајна разработка. Основачот поминал низ неколку итерации додека не дојде до функционално решение и стабилен лет, кој првпат го реализираше во мај 2023 година во Полска, појаснуваат од компанијата.

Иако техничките спецификации и цената сè уште не се објавени – освен информацијата дека "AirBike" наводно достигнува брзина до 200 км/ч – возбудата на социјалните мрежи расте.

„Иднината е тука! Најдобро лично летечко возило што досега сум го видел според дизајнот и летот“, напиша еден корисник на "Instagram". „Генерацијата што порасна со "Star Wars" те чекаше, пријателу. Те молам забрзај. Стануваме постари, но сè уште сакаме да полетаме“, коментираше друг.