Најдобрите европски земји за инвестирање во недвижности во 2025 година се наоѓаат во Централна и Источна Европа, а Молдавија е на чело, пишува Euronews.

Оваа земја ја освои највисоката оценка во новата студија која ги анализираше најпрофитабилните инвестиции во недвижности во Европа, според британската осигурителна компанија „Вилијам Расел“.

Клучните елементи на инвестирањето во недвижности беа во фокусот, вклучувајќи ги стапките на данок на имот, данокот на приход од закупнина и бруто приносот од закупнина.

Во претходната студија на британската компанија „1st Move International“, Литванија беше означена како најдобар избор. Во тековниот извештај, оваа северноевропска земја го освои второто место, веднаш зад Молдавија, а веднаш по неа е Македонија.

Молдавија е означена во студијата како „растечки, високо профитабилен пазар за рани инвеститори во недвижности кои не се склони кон ризик“, со оглед на тоа што дополнителните трошоци за купување имот се максимум 2,80 проценти од цената, а данокот на приход од кирија е 12 проценти, што обезбедува висок рејтинг на принос.

Земјата е високо рангирана благодарение на главниот град Кишињев, кој во последните години бележи постојан развој во инфраструктурата, угостителството и бизнис секторот.

Ова, заедно со растечкиот туризам поттикнат од винската индустрија и културното наследство на земјата, обезбедува можности за краткорочни изнајмувања. Сепак, Молдавија во моментов не е членка на ЕУ, туку е кандидат за членство во унијата.

Литванија е рангирана како земја со втора најдобра можност за инвестирање во недвижности.

Според податоците на Евростат, цените на недвижностите се зголемиле за речиси 10 проценти во последниот квартал од 2024 година во споредба со истиот период од претходната година, и се очекува овој тренд да продолжи.

И покрај фактот дека цените на недвижностите во земјата значително се зголемија во последните години, Литванија е привлечна за странските инвеститори бидејќи нема ограничувања за купување недвижности од страна на странци. Цените за изнајмување се исто така високи – над 170 проценти повеќе отколку во 2015 година.

„Со бруто принос од изнајмување од околу 6,39 проценти годишно и максимални трошоци за купување од 4,10 проценти, умерениот раст на Литванија значи дека цените на недвижностите веројатно ќе растат постојано со текот на времето, обезбедувајќи добар поврат на инвестицијата“, се вели во извештајот.

Македонија на висока позиција

Македонија, која е уште една земја кандидат за членство во ЕУ, беше рангирана како трета најдобра опција. Главниот град Скопјe доживува урбан раст, подобрување на инфраструктурата и зголемена побарувачка за станбен и деловен простор.

Земјата нуди ниски даноци и поедноставена постапка за стекнување недвижности, а постојат и владини стимулации за странските инвеститори. Според извештајот, Македонија бележи бруто принос од изнајмување од околу 6,47 проценти годишно, што укажува на силен поврат во однос на вредноста на недвижностите.

Остатокот од текстот можете да го прочитате ТУКА.