Сопругата и петгодишното дете на еквадорскиот фудбалер Џексон Родригез (26) биле киднапирани во раните утрински часови во средата, соопшти полицијата. Напаѓачи упаднале во нивниот дом во потрага по дефанзивецот на клубот Емелек, кој, според полицискиот извештај, изјавил дека се скрил под креветот веднаш штом слушнал дека влезната врата е насилно отворена.
Инцидентот се случил околу три часот наутро во крајбрежниот град Гвајакил, потврди началникот на полицијата, Едисон Родригез. Откако влегле во куќата, киднаперите ја прашале сопругата дали фудбалерот е присутен, а потоа ја одвеле неа и детето. Џексон Родригез изјавил дека преку прозорецот видел како напаѓачите заминуваат со сиво возило.
Реакцијата на фудбалерот предизвика бурни реакции во јавноста – дел од навивачите отворено го критикуваат поради тоа што не направил ништо за да ја заштити својата фамилија, туку се скрил.
Еквадор се соочува со сериозна криза на безбедност и пораст на криминалот во изминатите четири години, а според владините податоци, ситуацијата дополнително се влошила во првите месеци од оваа година. Од јануари до март се регистрирани 2.345 насилни смртни случаи, од кои дури 742 во Гвајакил – град оддалечен 270 километри југозападно од главниот град Кито.
И други спортисти биле жртви на слични напади. Во декември 2024 година беше киднапиран фудбалерот Педро Перлаза, кој тогаш играше за Лига де Кито. Тој беше грабнат во градот Есмералдас, 180 километри северозападно од Кито, а спасен беше неколку дена подоцна.
