Инстаграм ги отстрани белешките (Notes) од објавите и клиповите на Reels.
Во известување испратено до сите корисници, платформата соопшти дека функцијата Notes, која беше воведена во јули 2024 година, ќе биде исклучена по 3 април.
Можноста за додавање белешки на објавите и Reels беше воведена откако истата функција стана многу популарна во директните пораки (DM), особено кај помладите корисници.
Сепак, во новиот формат не ја постигна истата популарност, па Инстаграм реши целосно да ја укине, со цел да не ја комплицира апликацијата непотребно.
„Ја лансиравме пред неколку месеци во обид да го направиме Инстаграм посоцијален и позабавен, но во реалноста не ја користеа доволно луѓе. Свесни сме дека Инстаграм со текот на времето стана премногу сложен, а еден од начините на кои сакаме да го поедноставиме е преку отстранување на функциите што ретко се користат. Notes е една од тие функции,“ изјави извршниот директор на Инстаграм, Адам Мосери.
Што значи тоа за корисниците? Не многу – освен ако редовно ја користевте функцијата, што веројатно не е случај. Белешките сè уште ќе бидат достапни во DM, но повеќе нема да можете да ги користите во објави и кратки видеа.
Според Мосери, укинувањето на Notes е само почеток. Инстаграм планира и понатаму да ги отстранува функциите што не се доволно користени од страна на корисниците.
