Додека улиците во украинскиот град Суми беа исполнети со луѓе кои го одбележуваа празникот Цветници – денот што го симболизира влегувањето на Христос во Ерусалим – во небо одекнаа сирени, а неколку моменти подоцна, мирот беше уништен.
Руска ракета го погоди центарот на градот, оставајќи зад себе сцени на хорор: уништен тролејбус, растурени автомобили, оштетени згради и тела на цивили расфрлани на улицата. Според првичните податоци, најмалку 31 лице го загуби животот, а повеќе од 80 се повредени во еден од најкрвавите напади врз цивилно население во последните месеци, пренесува ABCNews.
„Непријателот повторно удри врз цивилното население. Нашата заедница претрпе страшна трагедија“, напиша вршителот на должноста градоначалник Артем Кобзар на Телеграм. Без многу зборови, но со длабока тага.
Украинскиот претседател Володимир Зеленски, во својата изјава, со гнев и болка порача:
„Ова беше обична улица, обичен живот – куќи, училишта, автомобили. И ова е ден кога луѓето одат во црква. Само беден човек би направил нешто вакво. Моето сочувство е со семејствата на загинатите. Ова е терор.“
Спасувачките екипи работеа со часови низ урнатините, обидувајќи се да извлечат преживеани и да ја расчистат зоната погодена од ударот. Во меѓувреме, снимките од местото на трагедијата се шират на социјалните мрежи – видео на кое се гледа моментот кога проектилот удира директно во тролејбус полн со луѓе стана симбол на уште еден ден на ужас и очај.
Зеленски повторно апелираше до меѓународната заедница: „Потребна ни е реакција. Остра. Без притисок врз Русија, оваа војна нема да заврши. Преговорите никогаш не ги сопреле бомбите. Потребно е светот конечно да ја третира Русија како тоа што е – терорист.“
И додека светот гледа, Украина брои нови загуби. Празникот на мирот се претвори во ден на плач. Суми ќе памети. И нема да прости.
