Иако многу фактори влијаат на квалитетот и времетраењето на сонот, новото норвешко истражување открило дека користењето на мобилните телефони пред спиење може да резултира со послаб квалитет на сонот и пократко време на спиење.
Резултатите покажале дека секое едночасовно зголемување на времето поминато пред екраните го зголемува ризикот од несоница за 59 отсто и го скратува времетраењето на спиењето за 24 минути.
Студијата опфатила 45.202 млади лица на возраст од 18 до 28 години и истражувала различни видови на активност на екраните и нивниот ефект врз спиењето. Целосните резултати биле објавени на 31 март во „Frontiers in Psychiatry“.
„Иако претходните истражувања често сугерирале дека користењето на социјалните мрежи особено го нарушува сонот, нашите наоди го оспоруваат тоа тврдење“, изјави за „Healthline“ авторот на студијата, Берг Сивертсен, постар истражувач во Норвешкиот институт за јавно здравје.
Студијата ги следела активности како што се користење на социјални медиуми, гледање телевизија и филмови, играње игри, слушање музика или поткасти и читање. Сивертсен рекол дека последователното истражување ќе вклучи употреба на телефони за задачи поврзани со работата пред спиење.
Претходните истражувања покажале дека светлосните бранови од екраните може да го нарушат спиењето и да го нарушат природниот циркадијален ритам на телото.
Постојат докази дека изложувањето на сина светлина пред спиење ја нарушува регулацијата на производството на хормонот мелатонин, кој помага во промовирање и одржување на сонот. Како резултат на тоа, многу производители на телефони сега нудат функции за филтрирање на сина светлина за вечерна употреба на нивните уреди.
Сепак, не секој реагира на силна светлина на ист начин.
„Мислам дека е важно да се признае постои значителна разлика меѓу поединците во однос на тоа колку светлина може да го потисне мелатонинот – околу 50 пати“, изјавил за „Healthline“ д-р Џонатан Седернес, експерт за спиење на Универзитетот Упсала во Шведска, кој не бил вклучен во студијата.
Осврнувајќи се на неговата студија, Сивертсен рекол: „Интересно е тоа што студентите кои исклучиво користеле социјални мрежи имале најниски стапки на несоница и најдолго времетраење на спиењето во споредба со оние кои се занимавале со други активности на екранот или комбинација на активности“.
Неговата студија претпоставува дека учеството на социјалните мрежи всушност може да има помал ефект од другите активности, бидејќи социјализацијата што ја поддржува може да го заштити спиењето.
Сепак, една студија од 2019 година покажала дека употребата на екран од секаков вид предизвикува проблеми со спиењето кај адолесцентите и помалите деца. Тоа може да вклучува социјални мрежи, гледање телевизија или филмови, играње игри или читање.
