Плејоф фазата во макeдонската ракометна Суперлига стартува со големо дерби меѓу Вардар и Алкалоид, натпревар по кој треба да дознаеме кој тим ќе направи важен исчекор во битката за титулата.
Пресметките меѓу двата скопски тима се многу интересни во последно време и полека нивното ривалство прераснува во едно големо дерби, па затоа вечерва во 19:00 часот се очекува да биде нависитна возбудливо во СЦ „Јане Сандански“.
Гоце Георгиевски како еден од најискусните играчи на Вардар се вклучи во програмата на „Спортското радио 90,3 фм“, па покрај тоа што направи најава за дербито, испрати и покана до сите љубители на ракометот и спортот вечерва да се појават во салата во Аеродром.
– Ждрепката посака да имаме големо дерби уште во првото коло, ни доаѓа многу квалитетен противник и знаеме што да очекуваме. Имавме време да се подготвиме, го анализиравме Алкалоид и подготвени сме за нив. Очекувањата се меѓусебните дуели со Алкалоид и Еурофарм Пелистер да одлучат за титулата, но очекувам супер интересен плејоф во кој не треба да ги заборавиме и Охрид и Тиквеш кој е незгоден на домашен терен, – изјави Георгиевски, кој не пропушти да се наврати на двата меча меѓу Вардар и Алкалоид од првиот дел од сезоната, на кои видовме по една победа на двата тима.
– Двата натпревари кои ги одигравме оваа сезона беа неизвесни и интересни и покажаа дека двата тима играат напаѓачки ракомет со многу трчање. Беа постигнати голем број погодоци, нивниот тим е исполнет со млади македонски играчи кои трчаат во текот на 60 минути и мислам дека не чека еден интересен и возбудлив меч, – додаде искусното крило, кое за крај ги повика фановите во што поголем број да се појават во „Јане Сандански“, особено поради тоа што сите собрани средства ќе заминат за погодените семејства од Кочани.
– Овој натпревар има и хуманитарен карактер, клубот одлучи средствата да бидат наменети за жртвите во Кочани и затоа и ги канам сите љубители на спортот и ракометот да дојдат вечерва. Ќе гледаат интересен натпревар, а истовремено ќе покажат хуман гест за сите настрадани во Кочани, – заврши Георгиевски.
Изјавата на Георгиевски слушнете ја ТУКА.
