Стартот на Џејмс Тарковски над Алексис МекАлистер на вчерашното градско дерби меѓу Ливерпул и Евертон предизвика многу коментари, најмногу поради фактот што главниот судија покажа само жолт картон, а ВАР собата не го повика на дополнително гледање на снимката.
Фудбалерот на Евертон стартуваше прежестоко над Аргентинецот откако ја зафати топката, па фановите на Ливерпул очекувано беа разочарани што гостинскиот фудбалер не бил испратен во соблекувалната.
По многу коментари, експресно реагираше и Судиската асоцијација, која официјално потврди дека судиите направиле грешка на „Енфилд“.
Вообичаено, првиот човек на асоцијацијата, Хауард Веб во гостување на телевизија ги открива грешките и ги објаснува спорните одлуки, но сега е решено дека треба да има побрза реакција за да се намали тензијата околу одлуката на судиите.
Веб веќе имал контакт со Ливерпул, на чии преставници им е посочено дека Тарковски не требало да остане на теренот, а главната вина е лоцирана во ВАР собата, односно фактот што судијата Сем Берет не бил повикан да ја прегледа снимката.
За фановите на „црвените“ посебно интересен факт ќе биде тоа што во ВАР собата бил Пол Тирни, судијата со кого одамна во конфликт влезе и поранешниот менаџер Јирген Клоп.
