Априлилили! Веста што ја објавивме наутро, на 1 април, во која се наведува дека некои винарии од Бургундија, конкретно од Шабли и Монтраше, наместо со вино од своите апелации, ги полнеле шишињата со македонска смедеревка – е само првоаприлска шега.

Дека српскиот портал "VinoiFino" погоди во центарот на метата, сведочи фактот што многу регионални медиуми ја објавија оваа вест целосно сериозно, што само потврдува колку е актуелна темата за проблемите во винската индустрија.

Сè е измислица – нема место за грижи

Не познаваме ниту една винарија што се занимава со такви работи, не веруваме дека угледните куќи Шабли и Монтраше би се впуштиле во таква практика, ниту пак смедеревката, без разлика колку време созревала во француски дабови буриња, би можела да помине како шардоне пред непцето и носот на вистински познавач.

Дополнително, не постои енолог по име Теле Репомаш (обидете се да го изговорите ова име гласно …), ниту пак во Мрзенци постои винарија Газда Ѓоко.

Целата вест, од почеток до крај, е чист плод на имагинацијата на српскиот портал.

Во продолжение можете да ја прочитате првично објавената:

Некои винари од Бургундија, поточно од Шабли и Монтраше, наместо вино од нивните винарии, шишињата ги полнеле со македонска смедеревка.

Како што покажа истрагата што ја спровеле заеднички локалните агенции за спроведување на законот во соработка со Европол, мрежата на фалсификатори на вина кои увезувале вина од Балканот броела најмалку седум лица. Според обвинителството, тие купиле готово вино од винарската визба „Газда Ѓоко“ од Мрзенци, дополнително го одлежувале во барик буриња за да развијат специфичен француски карактер, а потоа го пласирале како Шардоне под етикетите на познатите винарии од Бургундија.

Францускиот енолог Теле Репомаш, кој работи за една од винариите чии сопственици се обвинети за фалсификување, застана во одбрана на својот работодавец и во исто време им даде голем комплимент на вината од Македонија:

– Едноставно, немаме доволно вино, и никој не се занимава со тој проблем! Сфативме дека смедеревката од Северна Македонија може да биде одлична алтернатива кога ја пробавме во локално балканско бистро на пат кон Грција. Па, тоа е феноменално, тие имаат многу камени тероари, соленоста и минералноста се неверојатни. Како да одолееме, особено по таа цена – прашува Репомаше.

Енологот додаде дека се шокирал кога видел дека Балканците ги пијат овие вина измешани со газирана вода и тоа, како што рече, со некаква плескавица печена на јаглен.

Според француските медиуми, сопственикот на винарија во Македонија, како што покажуваат сите докази, целосно не бил свесен за идната намена на неговите вина.

– Да, се шокирав кога слушнав дека нашата смедеревка се продава за повеќе од 250 евра по шише. Па, ние го продадовме тоа вино за 50 евроценти – искрен е Ѓоко Трпески, сопственикот на винаријата во центарот на овој голем скандал што на неочекуван начин ги поврза винарите од Франција и Македонија.

Денес е денот на шегата. Се надеваме дека не наседнавте на овој текст. АПРИЛИЛИЛИ!