Најскапото паркинг место во Бостон пред две години беше продадено за 500.000 долари. Се наоѓа во гаражата "Brimmer Street", во елитната населба "Beacon Hill", а покрај самото паркирање, понудата вклучува "valet" услуга, полнење гориво, миење возила и целосна "concierge" услуга.

Со димензија од 2,7 × 5,5 метри, паркингот моментално повторно е на продажба, но сега цената е зголемена за 50% во однос на претходната продажба и изнесува неверојатни 750.000 долари.

Агентот верува дека цената е оправдана

Според агентот за недвижности Рене Родригез од агенцијата "Cabot & Company", цената е реална, бидејќи ова паркинг место нуди многу повеќе од само бетонски простор, пренесува "The Sun".

„Ова е ексклузивно "valet" паркинг место, гаражата е секогаш под надзор, а во секој момент тука работат шест до седум вработени“, изјави тој за "NBC Boston".

„Ако поседувате куќа вредна 15 милиони долари која нема паркинг, ова значително ја зголемува нејзината вредност. А таа вредност нема да падне – на "Beacon Hill" не се градат нови паркинг места, па затоа сметам дека ова е паметна инвестиција за луѓето кои живеат тука“, додаде Родригез.

Од 7.500 до 750.000 долари – како цените вртоглаво пораснаа

Паркинг местата во гаражата "Brimmer Street" првпат биле ставени на продажба во 1970-тите, по цена од околу 7500 долари.

До 2013 година, цената скокнала на околу 300.000 долари, а една деценија подоцна неколку паркинг места се продадени за 500.000 долари.

Сега, со цена од 750.000 долари, овој паркинг простор е еден од најскапите во Бостон, а агентите очекуваат дека цените ќе продолжат да растат.