АфД го удвои бројот на мандати

Бундестагот сега има 630 пратеници, од кои 230 се нови членови. Парламентот заседава во единствен момент од повоената германска историја: АфД го удвои бројот на пратенички места на 152, додека центристичките партии прават пресврт на одбранбената и фискалната политика како одговор на растечките закани за европската безбедност.

Парламентарците во ова свикување се на возраст од 23 до 84 години. Најмладиот е Лук Хос, студент од екстремната левичарска партија „Die Linke“, кој најавил дека ќе донира најголем дел од својата пратеничка плата од 11.000 евра месечно. Најстариот е Александар Гауланд од АфД, поранешен новинар кој во 2018 година ги минимизирал злосторствата на нацистите, велејќи дека тоа се „само птичји измет во илјадагодишната германската историја“.

Новиот Бундестаг има околу стотина пратеници помалку од претходниот, откако поранешната влада го реформирала изборниот закон со цел да го намали бројот на пратеници. Жените сочинуваат помалку од една третина од новите пратеници, што е нешто помалку од претходниот состав.

Родова нерамнотежа

Родовата нерамнотежа е најмалку изразена во партијата на Зелените, каде жените сочинуваат 61,2 отсто од пратениците, а најмногу во АфД, каде што жените сочинуваат само 11,8 отсто. Во демохристијанските партии, жените се исто така малцинство: 22,6% во ЦДУ и 25% во ЦСУ.

Парламентарците со странско потекло исто така се значително послабо застапени. Според процените на непрофитната организација Медиенденст Интеграција, само 11,6 отсто од пратениците имаат барем еден родител кој при раѓање немал германско државјанство, додека овој удел во вкупното население е околу 30 отсто.

Зада Салиховиќ, 24-годишна пратеничка на „Die Linke“ втората најмлада пратеничка во Бундестагот, рече дека парламентот сè уште го „одразува привилегирано малцинство“ и не ги претставува соодветно жените, работниците, младите, источните Германци и луѓето со мигрантско потекло.

„Тоа не е случајно, туку израз на структурни бариери и односи на моќ“, рече таа. „Кога парламентите се толку хомогени, не недостасува само мнозинската перспектива – туку праведни решенија“.

Првата седница ќе ја отвори пратеникот со најдолг стаж

Првата седница ќе ја отвори Грегор Гиси, пратеникот со најдолг стаж во парламентот, кој политичката кариера ја започнал во владејачката партија DDR. Гиси, кој сега има 77 години, ќе има слобода да ја одреди должината и содржината на својот говор и ќе претседава со седницата додека не се избере нов претседател на Бундестагот.

ЦДУ/ЦСУ за оваа позиција, ја номинирал партиската благајничка на ЦДУ, Јулија Клокнер, поранешна министерка за земјоделство во владата на Ангела Меркел.

Зелените протестираа откако се појавија информации дека Клокнер планира да се сретне со пратениците на АфД, што тие го окарактеризираа како „погрешен сигнал за нормализација“. Според „Redaktionsnetzwerk Deutschland“, состанокот бил откажан поради преклопувања во распоредот.

Напнати коалициски преговори за формирање нова влада

Во тек се тензични коалициски преговори меѓу ЦДУ/ЦСУ, најсилната парламентарна група, и Социјалдемократската партија (SPD). Идниот канцелар, Фридрих Мерц се надева дека ќе формира влада пред Велигден.

Веројатната идна влада веќе постигна една важна победа: овој месец ја обезбеди поддршката на Зелените за измена на уставот и привремено укинување на „сопирачката за долгот“. Предлогот беше одобрен од Бундесратот во петокот, со што се отвора патот за пакет инвестиции во одбранбените, инфраструктурните и климатските мерки кои ќе се финансираат со ново задолжување.

Тој предлог најверојатно ќе пропадне во новиот Бундестаг, кој сега вклучува „блокирачко малцинство“ составено од пратеници на АфД и „Die Linke“, кои се противат на испраќање оружје во Украина.