Алкатраз е остров со површина од 9 хектари во заливот Сан Франциско во САД. Во средината на минатиот век тој се сметал за најбезбедниот затвор во Америка. Денес е главна туристичка атракција што ја посетуваат повеќе од милион луѓе секоја година.
1. Алкатраз во превод од шпански значи пеликан, а островот го добил името по овие птици. Се вели дека во далечната 1775 година, шпанскиот истражувач Хуан Мануел де Ајала го нарекол „La Isla de los alcatraces“ или островот на пеликаните, а го носи и прекарот Хрид.
2. Островот првично бил замислен како воена тврдина, а многу години подоцна официјално станал затвор. Меѓутоа, група Индијанци таму биле затворени на крајот од 19 век бидејќи одбиле да се однесуваат во согласност со правилата на американската влада.
3. Ќелиите во затворот биле помали од некои плакари.Во блоковите Б и Ц димензиите биле само 1,5 × 2,7 метри, што било доволно за да се вклопат мал кревет, тоалет и минијатурен мијалник со ладна вода.
4. Затворот бил отворен до 1963 година, кога бил затворен засекогаш на 21 март. Во времето на неговата најголема популарност, чуварите и другиот затворски персонал живееле на островот со своите семејства.
5. Инаку 36 лица се обиделе да побегнат од Алкатраз. 23 лица биле фатени во бегство, шест биле застрелани од стражарите, а двајца се удавиле. Останатите пет мажи исчезнале без трага. Се претпоставува дека и тие се удавиле, но нивните тела никогаш не биле пронајдени.
6. Бројни криминалци ја отслужувале казната во Алкатраз, а најпознат е Ал Капоне, кој таму поминал четири и пол години.
7. Иако некогаш се тврдело дека никој не може да преплива од Алкатраз до брегот, тоа всушност е возможно. Покрај тоа, секоја година се одржува триатлон наречен „Бегство од Алкатраз“ (Escape from Alcatraz Triathlon) што го докажува ова тврдење. Од островот до Сан Франциско се плива 2,4 километри, се вози велосипед 28 километри и се трча 12 километри.
