Животот на Јосип Броз Тито низ сите години на неговото постоење, но и многу по неговата смрт, е анализиран во најситни детали. Сепак, некако секогаш се занемарувал периодот од неговата млада возраст, пред да стане претседател на Југославија. Сега, со објавувањето на неговата фотографија од притвор по апсењето, и тој дел од неговата биографија доби поголемо внимание. Многумина воопшто не го препознаа Броз на оваа фотографија, а зад сето тоа се крие многу интересна приказна.
За време на прославата на Први мај 1928 година во Загреб, дошло до судир помеѓу полицијата и работниците. Загрепската полиција им забрани на Независните синдикати да одржат првомајски митинг во киното „Олимп“, поради што работниците, на иницијатива на Јосип Броз Тито, тогашен секретар на Месниот комитет на КПЈ за Загреб, заминаа во киното „Аполон“, каде што социјалистите ја одржуваа својата првомајска средба. Кога работниците се обидоа да го претворат собирот на социјалистите во митинг на Независните синдикати, полицијата интервенираше и ги уапси Јосип Броз и Камило Хорватин.
И покрај полициската интервенција, демонстрациите сепак се одржаа, што доведе до нови судири со полицијата и дополнителни апсења на неколкумина работници, пишува „historija.info“.
Осуден на 14 дена затвор
Во Загреб, Кралската редарствена управа ги осуди Јосип Броз, Камило Хорватин, како и уште петмина уапсени работници на 14 дена затвор поради учество во забранети демонстрации по повод Први мај.
Организаторот на демонстрациите, Јосип Броз, бил подложен на дактилоскопска обработка (криминалистичка евиденција) на 4 мај 1928 година. Ова било неговата прва „обработка“.
Педесет и две години подоцна, на истиот датум, 4 мај 1980 година, беше извршена неговата последна обработка – обдукцијата.
Детален опис на изгледот
Од полициските досиеја дознаваме, покрај општите информации за неговото потекло и семејство, кои денес се добро познати, и детали за неговиот физички изглед, вклучувајќи специфични карактеристики.
Во извештајот се наведува дека Тито бил висок 170 см, со „витка и исправена“ градба. Косата му била „темно густа, руса“, мустаќите – избричени, веѓите – темно сини, густи и прави, лицето – овално и суво, тенот – темен, очите – сини со средна големина, челото – средно, заоблено и косо, носот – дебел, среден и прав, устата – средна, брадата – округла и избричена, рацете – долги и тенки, а му недостигале неколку заби.
„Извајаната“ вилица како заштитен знак во младоста
Секако, Јосип Броз во младоста изгледал сосема поинаку од сликата што ја имаме за него како лидер на Југославија. Може да се каже дека бил модерен и во добра форма, а „извајаната вилица“, која му го красела лицето во тие години, денес би чинела многу пари кај пластичен хирург. Тито ја добил „со раѓање“.
Иако подоцна фокусот не бил на неговиот изглед – или барем не на изгледот во младоста – туку на неговите политички одлуки, бракот со Јованка, синот и вилите, се чини дека интересот за животот на поранешниот доживотен југословенски претседател не стивнува, а постојано се бараат нови перспективи од кои неговиот живот може да се анализира и разгледува.
