Најмалку 40 загинати, десетици повредени во американските бури и торнада
Најмалку 40 лица загинаа, а десетици беа повредени минатиот викенд за време на серија силни бури и торнада, придружени со шумски пожари, кои го погодија централниот и јужниот дел на САД, соопштија локалните власти.
Најголем број на жртви имаше во државата Мисури, каде животот го загубија најмалку 12 лица.
Невремето остави разурната инфраструктура, целосно уништени згради, превртени камиони по патиштата и откорнати дрвја.
„Штетата е страшна. Домовите и деловните објекти се уништени, целосни заедници останаа без електрична енергија, а патот до реконструкција нема да биде лесен,“ изјави гувернерот на Мисури, Мајк Кехо, по обиколката на најтешко погодените области.
Слични сцени се забележани во неколку други американски држави во регионот. Осум лица загинаа во Канзас по натрупување предизвикано од песочна бура, шест загинаа во Мисисипи, а четворица во Оклахома, која исто така беше погодена од повеќе пожари, соопштија локалните власти.
Американскиот претседател Доналд Трамп напиша на својот Твитер профил дека внимателно ги следи силните торнада и бури кои ги погодија бројни држави на југот и средниот запад. Трамп исто така нагласи дека Националната гарда е распоредена во државата Арканзас и дека неговата администрација е подготвена да ги поддржи локалните власти во нивните напори да помогнат на заедниците да се опорават од штетата.
Американската Национална океанска и атмосферска администрација (NOAA) забележа скоро 1.800 торнада во 2024 година низ целата територија на САД, што е најголем број од 2004 година.
