Одењето во теретана генерално е добра идеја, но бидејќи вежбањето го троши организмот, а напорното вежбање го зголемува ризикот од срцев удар и срцев застој, неопходно е умерено да вежбате и да правите чести паузи.

Кога станува збор за тренинзите, проф. Д-р Петар Оташевиќ, специјалист по интерна медицина со субспецијалност по кардиологија и вонреден професор на Медицинскиот факултет во Белград, во интервју за „Мондо“ рече дека лекарите апсолутно го препорачуваат вежбањето, но дека е неопходно да се направат одредени здравствени проверки, особено кај средовечни или постари лица.

„Вежбањето е нешто што ние лекарите го советуваме сите да го прават, покрај избегнувањето на брзата храна и генерално секоја храна која содржи големо количество на масти, шеќер или јаглехидрати. Се препорачува редовно вежбање во траење до 150 минути неделно, но тоа не мора да биде тренинг во теретана, туку каква било форма на физичка активност по сопствен избор, како пешачење, брзо одење, трчање, возење велосипед итн.“, рече лекарот.

Сепак, како што советува, потребна е одредена претпазливост и претходна контрола, особено кога се работи за средовечната популација.

„Доколку сте средовечни, пред да одлучите да започнете со вежбање, особено ако планирате да одите во теретана, би било добро да ја проверите вашата општа здравствена состојба или да направите кардиолошки преглед кој вклучува проверка на крвниот притисок, лабораториски тестови, ЕКГ и ултразвук на срцето, за да се утврди дали вежбањето е безбедно за вас и со кое темпо треба да вежбате“.

Пресметајте ја вашата максимална срцева фреквенција

Кога станува збор за кардио спортови и вежби како трчање, пливање и возење велосипед или прескокнување јаже, кои ја зголемуваат издржливоста, лекарот посочи дека тие имаат позитивно влијание врз кардиоваскуларниот систем. Дополнително, кардио вежбите го зголемуваат трошењето на калории, што е добро за контрола на тежината.

„Кардио тренинзите имаат бројни позитивни ефекти и се препорачуваат за сите, под услов да го приспособите интензитетот на вашата кондиција и општата физичка состојба. Ова се аеробни вежби кои всушност ја зголемуваат нашата издржливост, а при што се активираат сите мускули, вклучувајќи го и срцето. На овој начин се троши повеќе кислород и се топат насобраните масти“, објасни лекарот која уште еднаш нагласи дека одредени возрасни групи треба да си го проверат здравјето пред да одлучат да почнат со вежбање.

Од друга страна, генералниот совет на Оташевиќ е да внимавате колку брзо отчукува вашето срце.

„Тоа не треба да оди над максималната срцева фреквенција, која се пресметува така што од 220 ќе ја одземете бројката на вашите години. На пример, доколку имате 50 години, кога ќе ја одземете таа бројка од 220, доаѓаме до пресметка дека вашето срце не треба да чука побрзо од 170 отчукувања во минута, односно, тоа е максималната горна граница“, нагласи докторот, и додаде дека колку е човекот постар, неговата максималната срцева фреквенција ќе биде сè помала.