Легендарниот Златан Ибрахимовиќ пристигна со Милан во Загреб како член на делегацијата на италијанскиот клуб кој во Лигата на шампионите беше поразен од Динамо со 2:1 на Максимир и очекувано поранешниот фудбалер се најде во центарот на вниманието.
Иако најави победа, Росонерите со наведнати глави си заминаа од Максимир и останаа без директен пласман во осминафиналето, а она што привлече големо внимание беше изјавата на Ибрахимовиќ пред натпреварот, која тој ја даде на босански јазик.
„Дојдовме за да победиме. Ако победиме, влегуваме директно во најдобрите осум клубови и не би морале да играме дополнителни два натпревари за плеј-офот. Денес тоа е важно за нас, и Милан е клуб кој треба постојано да победува“, рече тој во најавата на натпреварот меѓу Динамо и Милан, не насетувајќи што го чека неговиот клуб.
И покрај тоа што Росонерите беа фаворити, Ибра го пофали Динамо.
„Имаат осум бода во Лигата на шампионите. Направија големи работи и треба да притискаат и да одат напред. Тие се на третото место во домашното првенство, но има уште време за лигата“, изјави Ибра.
На крајот од интервјуто за ХРТ, Ибрахимовиќ запраша каков бил, што го насмеа водителот, но и гледачите покрај малите екрани, при што новинарот констатираше дека бил одличен.
Потсетуваме, Динамо и покрај победата од 2:1 остана прв тим под линијата поради послабата гол-разлика и не се пласираше во плеј-офот. Милан, пак, во плеј-офот ќе игра против Феенорд или Јувентус.
