Маск се огласи за обвинувањата дека извел нацистички поздрав: Им требаат подобри валкани трикови

За време на прославата на инаугурацијата во арената Capitol One во Вашингтон, Маск, извршниот директор на „Тесла“ и основач на „Спејс Икс“, изведе движења кои наликуваа на нацистички поздрав.

Се чинеше дека е воодушевен од можноста да испрати човек на Марс и да постави американско знаме на таа планета додека удира по градите и ја испружи десната рака кон небото.

„Ви благодарам, моето срце оди кон вас“, рече тој пред да се сврти и да го повтори бизарниот гест кон американското знаме.

Овој потег предизвика контроверзии на интернет, а многумина го опишаа гестот како фашистички поздрав или „необичен“ поздрав.

Новинарката на Си-ен-ен, Кејси Хант рече дека движењето „потсетува на работи што сме ги виделе во историјата“ и „не е нешто што обично го гледате на американските собири“.

Други на Икс го обвинија Маск за „изведување на нацистички поздрав“ и дека тоа е „јасно како ден“, додека други тврдат дека потегот е неодбранлив и не можел да биде случајност бидејќи го направил тоа двапати.

Меѓутоа, во одбрана на Маск застана Anti-Defamation League, организација која се бори против антисемитизмот.

„Се чини дека тој направи незгоден гест во момент на ентузијазам, а не нацистички поздрав, но повторно, ги цениме луѓето што внимаваат на овие работи“, објави организацијата на Икс.

Тие ги повикаа сите политички партии да ги намалат тензиите во „овој деликатен момент“ и да работат заедно кон единство.

Американската конгресменка Александрија Окасио-Кортез возврати на групата со седиште во Њујорк.

„Само за да бидам јасна, вие го браните поздравот Хајл Хитлер кој беше изведен и повторен за нагласување и јасност. Луѓето сега официјално можат да престанат да ве гледаат како кој било релевантен извор на информации. Вие работите за нив. Ви благодариме што им го разјаснивте тоа на сите“, напиша таа.

Маск одговори со коментар велејќи дека Окасио-Кортез „целосно го изгубила умот“.

„Искрено, им требаат подобри валкани трикови. Нападот ‘сите се Хитлер’ е толку истрошен“, напиша тој во продолжение.