Комеморативна британска монета посветена на Џорџ Орвел со цртеж на око и натпис „Големиот брат те гледа“.
Комеморативна британска монета посветена на Џорџ Орвел со цртеж на око и натпис „Големиот брат те гледа“.
Комеморативна монета со мотив на око и натпис „Големиот брат те гледа“ ќе биде издадена во чест на писателот Џорџ Орвел, авторот на романот „1984“, по повод 75-годишнината од неговата смрт, соопшти британската кралска ковачница.
Иако монетата од две фунти изгледа како да има око, всушност се работи за објектив на камера, а на работ е врежан уште еден цитат од дистопискиот роман на Орвел: „Имаше вистина и имаше невистина“.
Уметникот Хенри Греј изјави дека темата на тоталитаризмот е централна за неговиот дизајн.
„Со телефони и камери во секој агол од вашиот дом и огласувачи кои ве прислушуваат преку телефонот, навистина сте свесни дека сте постојано набљудувани – и тоа е суштината на „1984“. Затоа окото во дизајнот не е вистинско. Нема трепки или слични детали – тоа е речиси како објектив на камера кој постојано ве гледа“, објасни Греј.
Романот „1984“, сместен во измислена иднина, ја следи приказната за државниот службеник Винстон Смит и неговиот таен бунт против тоталитарната влада и нејзиниот водач, Големиот брат.
Орвел, исто така познат по својата сатирична политичка басна „Животинска фарма“, почина во Лондон на 21 јануари 1950 година, на 47-годишна возраст, само неколку месеци по објавувањето на романот „1984“.
Кралската ковачница соопшти дека колекционерската монета ќе биде пуштена во продажба во среда, по цена од 17,50 фунти.
Претходно, на монетите од две фунти беа прикажани и други значајни литературни личности, меѓу кои Вилијам Шекспир, Џејн Остин и Џ. Р. Р. Толкин.
