Најголемото разочарување во тимот на Мачестер јунајтед, во последните 10 можеби и повеќе години, играч за кого клубот летото 2022 издвои 95 милиони евра, во јануарскиот преоден рок ќе го напушти „Олд Трафорд“.
Бразилецот Антони во Манчестер јунајтед дојде на препорака на тогашниот менаџер Ерик Тен Хаг. Ајакс извлече огромна сума за неговиот трансфер. Антони и Тен Хаг успешно соработуваа во Ајакс, што не се случи во Јунајтед.
Бразилецот, поради лошата форма и скандалите кои го следеа во приватниот живот стана вишок. Најпрвин ја загуби дврбата од Тен Хаг, а истото се случува и кај новиот менаџер Рубен Аморим.
Моменталната вредност на Антони, според „Трансфермаркт“, сега изнесува „само“ 20 милиони евра.
Договорот на Антони истекува во 2027 година, јасно е дека Јунајтед не може да очекува дека некој ќе понуди сума за негов трансфер која ќе ги задоволи клупските челници. Реално е Бразилецот да замине на позајмица, но и тука постои проблем. Неговата плата изнесува 12 милиони евра.
„Марка“, пренесува текст на „АБЦ де Севилја“, во кој се наведува дека Антони ќе биде предмет на „најшокантниот трансфер во зимскиот преоден рок“. Според истиот медиум, Реал Бетис, деветтопласираната екипа во Ла Лига сериозно е заинтересиран за Антони.
Шпанскиот клуб веќе стапил во контакт со Јунајтед за да разговараат за условите на договорот.
Според Шпанците, Бетис предложил позајмица во која би преземале помал дел од платата на Антони од 12 милиони евра годишно. Исто така, тоа би било шестмесечна позајмица со опција за продолжување на уште една година, но само доколку Антони се согласи да се откаже од значителен дел од платата.
