Повеќе од една милијарда луѓе ширум светот се дебели, вклучувајќи околу 159 милиони деца. Една од земјите која води според процентот на најдебели луѓе во светот се САД. Доколку пак го барате градот со најмногу дебели луѓе во Америка, патот ќе ве однесе до Мекален. Имено во овој град на самиот југ од Тексас живеат дури 45% дебели луѓе.
Дополнителни 31 процент од возрасните во Мекален се со прекумерна тежина, но не се дебели. На едно од неговите многубројни патувања, овој град го посети Роберт Дацешин, патописецот кој неуморно раскажува интересни приказни од целиот свет.
„Уште една шокантна и бизарна приказна нѝ доаѓа од Америка, каде што го посетивме градот со официјално најдебелите луѓе, според статистиките и истражувањата спроведени пред неколку години, а Мекален оваа титула убедливо ја освои најмногу пати, и тоа неколку години по ред, вели Роберт и додава:
„Поминавме неколку часа овде за да видиме дали навистина е така, а патем разговаравме и со човек кој изгубил двајца од најблиските членови на неговото семејство поради дијабетес тип 2, кој и тој самиот го има. Тој денес се бори со дебелината, ги едуцира децата и се обидува на сите начини преку предавања, промоција и едукација да влијае врз населението, како на овој град, така и на пошироката околина.
Иако веќе знаевме дека Америка ја има една од најдебелите нации и е голем лидер во ова, да се види сето ова во град кој беше прогласен за град со најдебелите луѓе беше навистина невообичаено, без оглед на тоа што го очекуваме истото.
Во градот не недостигаат ресторани за брза храна, а Роберт истакнува дека цените се многу прифатливи за американски стандарди. Бројот на калории е означен на менијата, а на пример, некои од хамбургерите имаат повеќе од 1500 калории. Ова е многу загрижувачка бројка, ако се земе предвид дека на умерено активните луѓе им се препорачува да внесуваат 1900 калории за жени и 2500 за мажи.
