Тажна вест го погоди светот на боксот во петокот попладне кога беше објавено дека Пол Бамба, боксерскиот шампион, ненадејно починал на 35-годишна возраст. Причината за смртта сè уште не е позната, но потврдено е дека тој починал во петокот попладне.
Веста беше објавена на Инстаграм со порака: „Со големо жалење ја објавуваме смртта на саканиот син, брат, пријател и боксерски шампион Пол Бамба, чија љубов и светлина допреа многу животи“.
Го предизвика Џејк Пол
Бамба минатиот викенд ја освои титулата „WBA Gold Cruiserweight“ со победата против Рогелио Медина Луна, а низ кариерата постигна рекорд од 19 победи и три порази. Тој имаше одлична 2024 година во текот на која забележа 14 победи, а сите беа постигнати со нокаут, соборувајќи го рекордот на Мајк Тајсон од 13 нокаути за 12 месеци. По неговата последна победа, Бамба го предизвика Џејк Пол на борба.
„Џејк, можеш да дојдеш по ова, можеш да се бориш за тоа или можеш да продолжиш со лажните борби. На крајот од денот, јас си ја завршив мојата работа. Можеш да тврдиш дека боксот го сфаќаш сериозно и дека си заработил многу пари, но не се здоби со почит во боксот“, изјави Бамба пред неколку денови.
Бамба требаше да се бори против Томи Фјури
Пол Бамба требаше да се бори против Томи Фјури, полубратот на Тајсон Фјури, во 2020 година во Дубаи, но борбата потоа беше откажана поради проблеми со тежината на Фјури.
„Тој беше борец со голема самодоверба и непоколеблива амбиција да постигне врвни резултати. Но, пред сè, тој беше неверојатен човек кој инспирираше многумина. Ние сме скршени поради неговата смрт и љубезно молиме за приватност и разбирање во овој тежок момент додека тагуваме заедно“, пишува во објавата за смртта на боксерот.
