Медицинската сестра изјавила дека на персоналот на болницата им било забрането да зборуваат англиски со севернокорејските војници.
Повеќе од 200 ранети севернокорејски војници биле пренесени во руска болница во близина на Москва за неколку дена, според пресретнат разговор објавен од Службата за безбедност на Украина (СБУ) на Телеграм.
– Украинските одбранбени сили нанесуваат значителни загуби на руските и севернокорејските единици во областа Курск, стои во извештајот.
Во пресретнат разговор, медицинска сестра од болница во московскиот регион разговара со маж за кој се претпоставува дека е нејзин сопруг, руски војник кој се бори во украинската област Харков.
Донесоа Севернокорејци во нашата болница. Вчера имаше еден воз со околу 100, а денес 120. Тоа се веќе 220, а уште колку ќе донесат? Само Господ знае – рекла таа.
Медицинската сестра наводно објаснила дека болничките одделенија се чистат специјално за севернокорејските војници, додека руските војници се сместени во полоши услови, пишува „Киев Пост“.
Дали овие Корејци се некаква елита? Ослободуваме одредени одделенија за нив. Дали се тие привилегирани? – запрашала таа.
Таа исто така додала дека, ако севернокорејските војници побараат инјекции за анестезија, планира да ги одбие.
Одете по ѓаволите. Не разбирам што велите – ќе им кажам, изјавила медицинската сестра преку телефон, додавајќи дека „комуникацијата со нив е речиси невозможна“.
Според неа, проблемите во комуникацијата настануваат бидејќи севернокорејските војници не знаат руски.
Еј, сите изгледаат исто. Како да ги разликуваме? Можевме да ги обележиме со маркер на челото – му рекла таа на соговорникот.
Каква зоолошка градина! Наскоро нема да имаме со кого да разговараме. Тие само ќе мрморат нешто. Тоа е лудо!
Таа исто така споменала дека на болничкиот персонал му е забрането да зборува англиски со севернокорејските војници.
Не смееме да зборуваме со нив на англиски. Им е забрането да зборуваат англиски. Бидејќи се Севернокорејци, тие се со нас. Јужнокорејците се со Америка.
СБУ покрена кривична постапка за учество на севернокорејски војници во руската војна против Украина.
Украинските сили нанесоа големи загуби на севернокорејските војници кои се борат заедно со руската армија, со „неколку стотици“ убиени или ранети, изјавил висок американски функционер, цитиран од „Њујорк Тајмс“.
Севернокорејските војници, опишани како „без борбено искуство“, се особено ранливи на украинските напади врз командните центри и позиции на пешадијата.
Кирил Буданов, шеф на украинската разузнавачка служба (ХУР), објави дека големите напади врз севернокорејските војници во регионот Курск започнале минатата недела, со повеќе од 200 жртви.
Засилувања од 94-та посебна бригада на севернокорејската армија биле испратени за одржување на операциите по значителните загуби, се наведува во извештајот на ХУР на Телеграм.
Снимки од 414-от одвоен полк на Украина покажуваат повеќе од дваесет убиени севернокорејски војници, додека извештајот на силите за специјални операции (ССО) потврди 50 убиени и 47 ранети во рок од три дена, заедно со уништени возила и оклопна опрема.
Украинскиот претседател Володимир Зеленски го потврди распоредувањето на „значителен број“ севернокорејски војници во комбинирани единици. Помладиот наредник Станислав Буњатов ги опиша како дисциплинирани, но со низок морал при големи загуби.
Прес-секретарот на Пентагон, генерал-мајор Пат Рајдер, во понеделникот, 16 декември, го потврди првиот борбен ангажман на севернокорејските трупи заедно со руските сили.
