Индиската полиција ќе бара детали од "Starlink" во обид да ги пронајде шверцерите на дрога кои го користеле нејзиниот сателитски интернет уред за навигација во длабоките мориња и за првпат донеле метамфетамин вреден 4,25 милијарди долари во индиските води.
Полицијата во оддалечената воена база на Андаманските и Никобарските Острови минатата недела откри повеќе од 6.000 килограми метамфетамин на брод од Мјанмар кој носел сомнителни вреќи и уапсила шест државјани на Мјанмар.
Но, инцидентот предизвика тревога бидејќи тоа е првпат уредот "Starlink" да се користи за навигација и доаѓање до индиските води, изјавил Харгобиндер С Даливал.
"Starlink", кој тврди дека обезбедува покриеност во меѓународни води, планира да лансира услуги во Индија, но вели дека покривањето во територијалните води е предмет на одобрение од владата.
„Овој случај е специфичен затоа што ги заобиколува сите правни канали. Тие директно контролираа (телефони) преку сателит, создавајќи Wi-Fi хотспот. Шверцерите го користеле "Starlink" уште од почетокот на нивното патување од Мјанмар“, рече Даливал.
Тој исто така додал дека планира да ги праша "Starlink" за сите информации како: кој и кога го купил уредот, како и целата историја на неговата употреба.
"Starlink" не одговори на барањето за коментар
Полицијата на Андаманските и Никобарските Острови процени дека запленетиот метамфетамин имал малопродажна пазарна вредност од 360 милијарди рупии (4,25 милијарди долари).
Истрагата доаѓа кога "Starlink" се приближува до лансирање во Индија по неколкумесечно лобирање за обезбедување на сателитски спектар во услови на судири со индискиот милијардер Мукеш Амбани, кој постојано се спротивставува на овој потег и повика на аукции на тој спектар.
Даливал изјавил дека шверцерите го користеле уредот "Starlink Mini", кој на веб-страницата е опишан како „компактен, пренослив комплет кој лесно се вклопува во ранец“.
Полицијата на Андаманските и Никобарските Острови соопшти дека ја истражува улогата на локални или странски синдикати во целата мрежа додека се занимаваат со најновиот случај на заплена од сите агли.
Во 2023 година, заплените на метамфетамин, познат како мет, достигнаа рекордно високо ниво од 190 тони во Источна и Југоисточна Азија, бидејќи трговијата со метамфетамин преку море порасна во последниве години, соопшти Канцеларијата на Обединетите нации за дрога и криминал.
