Историски НБА потфат за Вестбрук, шампионот најде решение за непобедливиот Кливленд

Денвер после два порази покажа дека знае да победува и без Никола Јокиќ, а триумфот над Мемфис ќе остане во сеќавање поради историскиот потфат на Расел Вестбрук.

Играчот на Нагетси го заврши мечот со 12 поени, 10 скокови и 14 асистенции, што за него беше јубилеен 200-ти трипл-дабл во кариерата.

Вестбрук стана првиот играч во историјата на НБА лигата кој стигнал до границата од 200 трипл-дабли, откако веќе пред некое време го надмина историскиот рекорд на Оскар Робертсон.

Инаку, Денвер победи на гостувањето со резултат 110:122, а најефикасен во победничкиот тим беше Џамал Мареј со 27 поени.

Од другите средби, за издвојување е победата на шампионот Бостон, кој на домашен терен најде лек за досега непобедливиот тим од стартот на сезоната.

Кливленд застана на 15 победи во низа и конечно беше победен од еден тим, а тоа им успеа на Селтикси кои славеа со 120:117 во „Ти-Ди Гарден“. Тејтум со 33 поени беше најдобар во победничкиот табор, додека Мичел уфрли два поени повеќе на спротивната страна.

Лос Анџелес Лејкерс стигна до шестата победа во низа и покажа дека е во импресивна форма и против Јута Џез, славејќи на домашен терен со 124:118.

Далас исто така запиша победа на домашен терен и го преслуша Њу Орлеанс со 132:91, Бруклин беше подобар од Шарлот со 116:115, а Сан Антонио од Оклахома со 110:104.