Мачорот Марли, кој ги теши жените жртви на трговија со луѓе, е прогласен за мачка на годината на националната церемонија во Лондон.
Црно-белата мачка која живее во безбедна куќа за жени кои биле под ропство и експлоатација, ја доби наградата „Заштита на мачки“ (Cats Protection) како признание за сочувството што им го дава на жените во куќата „Каритас Бахита“ во Лондон.
„Честопати Марли ја става шепата на нозете на нашите гости, што е првата љубезност што ја доживеале по години. Тој има неверојатен дар на емпатија и им помогнал на многу жени на нивниот пат кон закрепнувањето“, рекла таа, пренесува „Гардијан“.
Куќата „Каритас Бахита“, која е дом за 11 жени од 11 земји, го посвоила Марли пред четири години од азил каде што бил сместен откако бил малтретиран од друга мачка во неговата семејна куќа.
„Пред да најде засолниште, му беше тешко, па ја препознава траумата на нашите гости бидејќи и тој страдал. На почетокот седи многу блиску, да види како реагираат жените. Потоа нежно ја става шепата на нивната нога, давајќи им до знаење дека не се сами“, рекла Анстис и додала дека една од жените жртви на трговија со луѓе во безбедната куќа „Каритас Бахита“ првично не сакала да разговара со никого, освен со Марли.
Марли првпат победил на јавното гласање во категоријата „неверојатни мачки“, која промовира мачки чија поврзаност со луѓето инспирира извонредни дела на љубов.
Марли потоа бил избран за национална мачка на годината од страна на жирито на познати личности и освоил трофеј и награден пакет вклучувајќи ваучер од 200 фунти за продавницата за домашни миленици.
