Веста за смртта на легендарниот пејач на „Рибља чорба“, Бора Ѓорѓевиќ, која одекна утрово растажи голем број негови обожаватели и во Македонија, каде тој често гостуваше со својот бенд.
Бора во Скопје последен пат настапи во април, на концертот на Жељко Сараџиќ во салата „Борис Трајковски“. Тој лани имаше и турнеја низ Македонија, пришто истакна дека концертот во Охрид во јули му останал во најубаво сеќавање. Тогаш тој симболично изведувајќи ја на свој начин „Билјана платно белеше“ ги повика обожавателите да го проследат настапот.
Гостуваше во Македонија и непосредно по ковидот, кога откри дека со колегите од бендот се многу среќни што ја отвораат сезоната на наконцерти токму во Скопје.
„Отсекогаш сме се радувале на свирките во Македонија, затоа што Македонците знаат да почитуваат добар рокенрол и затоа што секој има уво и пее како славејче“, рече тогаш фронтменот на групата.
Бора Ѓорѓевиќ беше автор и на текстот на песната „Малечка“ на Тоше Проески, а соработуваше и со голем број балкански музички ѕвезди.
Бендот „Рибља чорба“ е основан 1978 година и важи за еден од најзначајните рок-бендови, а Бора стана еден од најконтроверзните музичари во Југославија поради неговите провокативни и социјално ориентирани текстови. За кратко време групата стекна голема популарност, која трае до ден-денес и со која растеа повеќе генерации. Ѕвездите од естрадата на поранешните екс-ју простори се збогуваат со него преку социјалните мрежи.
