Обожавателите на Адел ги оценија нејзините концерти во Минхен ова лето како „апсолутна шега“ откако некои платиле и до 350 фунти за билет, а морале да се качат на столчињата за да ја видат сцената.
Посетителите на концертите во минхенската арена „Messe“, кои сакале да бидат што поблиску до својата омилена пејачка, не можеле да видат ништо бидејќи луѓето стоеле пред нив. Видеото се појави на ТикТок и е прегледано 1,5 милиони пати, а ги прикажува токму обожавателите како се качуваат на столчињата за да го гледаат концертот.
„Платив 316 фунти и не можев да видам ништо. Моите пријатели беа на седишта кои чинеа 60 фунти и имаа подобар поглед од мене. Бев бесен“, гласи еден коментар на видеото.
„Обезбедувањето им нареди на луѓето да се симнат од столчињата, па сите бевме на иста висина. Тоа беше апсолутна шега. Ги платив сите тие пари и едвај видов нешто“, гласи друг коментар.
Овој проблем се повторува откако Адел ја започна својата едномесечна серија концерти минатата недела на место со капацитет од 80.000 луѓе. Многу обожаватели, кои веќе купиле билети за нејзините концерти, изразиле загриженост дали ќе можат да видат нешто од нивните седишта.
Нина Френчи, обожавателка која дошла на концертот во инвалидска количка, исто така се пожалила дека тоа е „најлошото искуство во нејзиниот живот“, бидејќи големите камења околу арената го оневозможуваат „доаѓањето и напуштањето на концертот“, пишува „Daily Mail“.
„Организацијата на транспортот по концертот беше ужасна. Не размислуваа за излезот на лицата со инвалидитет“, напишала таа на мрежата „Х“ и додала: „Морав да туркам инвалидска количка преку големи камења и низ тесен простор полн со луѓе“.
