На 51-годишна возраст, Дикец и неговата партнерка Севал Илаида Тахран освоија сребро, но уникатниот стил на Дикец ја привлече и воодушеви светската јавност.

Сликата на која се гледа како Јусуф Дикец се натпреварува на необично опуштен начин, со едната рака во џеб и без стандардна опрема, стана вирална.

За разлика од повеќето олимписки стрелци, кои користат заштита за уши и специјализирани очила за да го блокираат видот и едното око и да го намалат сјајот, „лежерниот стил“ на Дикец навистина се издвојуваше. Поединци се прашуваат и дали „Турција испратила платен убиец во ОИ“?

За време на натпреварот, како што можевме да видиме, Турчинот ги носеше сопствените диоптриски очила, вообичаени чепчиња за уши и неупадлива тренерка и маица.

„Турција испрати 51-годишен дечко без специјализирани леќи, заштита за очи или заштита за уши и освои сребрен медал“, е коментарот на еден од многуте воодушевени обожаватели, како што пренесуваат светските медиуми, а се јавил и милијардерот Илон Маск со едноставно:

„Убаво“.

Во финалето, подобри од турскиот пар биле српските претставници Зорана Аруновиќ и Дамир Микес. Финалето го добиле со 16:14, иако имале послаб старт и губеле со 8:4.

Кој е Јусуф Дикец?

Делумно информираните корисници на социјалните мрежи желни за лајкови веројатно не знаат дека Дикец со стрелаштво се занимава од 2001 година, како и дека бил припадник на турската национална жандармерија, а ова му се петти Олимписки игри.

Неговите први ОИ биле во Пекинг 2008 година. Дикец освоил бројни златни, сребрени и бронзени медали на државни, европски и светски првенства.

Студирал на Универзитетот Гази за физичка обука и образование во Анкара, а подоцна магистрирал за тренер на Универзитетот Селџук во Коња. Дикец течно говори англиски и турски, а во слободно време ужива во танцувањето.

Дури и официјалниот профил на Олимписките игри на социјалната мрежа „X“ им оддал почит на новите неочекувани ѕвезди на спортот.