Сместено е на гребен висок 378 метри со прекрасен поглед на Јадранското Море, а денес во него живеат само неколку, односно двајца луѓе.

Поради својата автентичност и локација, селото Лубенице е исклучително популарна дестинација за туристите кои бараат мир и уникатно медитеранско искуство.

Целата населба е претежно изградена од ист камен како и околните карпи, а некои остатоци датираат од времето на старите Римјани.

Лубенице не е само туристичка атракција, туку и жив споменик кој ја чува историјата и традициите на овој дел од Хрватска. Лубенице е сместено на висока карпа, што овозможило ова село стратешки да се брани во различни историски епохи.

Ова доминантно место над морето служело како природна тврдина, заштитувајќи ги жителите од можни напади од морето. Низ вековите, Лубенице било под влијание на различни култури, вклучително илирската, римската и венецијанската, кои оставиле траги во архитектурата и културното наследство на селото.

Камена архитектура

Населбата е најпозната по својата автентична камена архитектура. Тесните улички, камените куќи и античките градби ги рефлектираат традициите и начинот на живот кој не се менувал со векови.

Централниот дел на селото е плоштадот, околу кој се наоѓаат најважните градби, меѓу кои и црквата Свети Антониј Пустиник, која датира од 15 век.

Камените ѕидови и куќите од варовник даваат чувство дека сте во временска машина, враќајќи ги туристите во далечното минато.

Најпознатата плажа во близина е плажата Лубенице, до која се стигнува по стрмна патека по карпата. Иако патот до плажата е предизвик, наградата вреди да се вложи труд. Оваа плажа често се опишува како една од најубавите во Хрватска, со бели камчиња и тиркизна вода.

Денес во Лубенице постојано живеат само две лица, додека во сезоната тој број се зголемува, најмногу поради еднодневните излети и туристите, пишуваат од „Croatia Week“.

Во текот на летните месеци, селото е домаќин на различни културни манифестации, вклучително концерти и ликовни изложби, кои дополнително ја збогатуваат туристичката понуда.