Руски воени подморници двапати спроведуваа мисии во областа околу Ирското Море од почетокот на инвазијата на Украина под команда на претседателот Владимир Путин.
Ова го објави Блумберг, повикувајќи се на три извори запознаени со ова прашање.
Тие оценија дека тоа е потег без преседан на Кремљ, кој ја принуди британската армија да преземе мерки за заштита на водите на Велика Британија и Ирска.
– Првото распоредување на руска подморница од класата Кило во близина на Ирското Море, кое го дели ирскиот остров од Велика Британија, се случи пред околу 18 месеци – изјавија извори на Блумберг кои инсистираа на анонимност.
Тие рекоа дека второто забележано руско воено присуство во областа се случило неодамна.
– Обемот на движење на оваа подморница беше поголем од она што претходно го видоа британските власти – изјавија изворите на американската агенција.
Блумберг објави дека руската подморница наводно била избркана од ирското пристаниште Корк.
Се наведува дека за движењето на тие подморници се запознаени и американските власти.
Во врска со оваа вест, Ројтерс контактираше со министерствата за одбрана на Русија и Ирска, како и со британското Министерство за надворешни работи и Белата куќа, но засега нема коментар.
Руските дизел-електрични воени подморници од класата Кило можат да лансираат крстосувачки ракети Калибр, како и торпеда и поморски мини.
