Доналд Реј Ланц и Џин Кеј Вајтфедер од Западна Вирџинија се обвинети за занемарување на деца. Наводно ги принудувале своите посвоени деца да работат како робови и да живеат во штала. Уапсени биле во октомври минатата година, откако е откриено дека петте посвоени деца – на возраст од 6, 9, 11, 14 и 16 години живеат во лоши услови.
Полицијата ја повикал соседот, загрижен за здравјето на малолетниците.
„Соседите известија дека децата се принудени да вршат земјоделски работи и дека не им било дозволено да влезат дома“, стои во обвинението. При интервенцијата, полицијата ги пронашла 14 и 16-годишното дете во шталата. Внатре немало ни светло ни вода. Еден од тинејџерите и кажал на полицијата дека последен пат јаделе пред 12 часа и дека биле принудени да спијат на бетон.
Ланц и Вајтфедер вчера пред судот се изјасниле како невини по повеќе точки од обвинението, вклучувајќи трговија со деца, користење на малолетни деца во принудна работа и занемарување на деца, известила локалната новинска куќа „Metro News“.
Судијката Мериклер Ејкерс тврди дека децата „во основа биле користени како робови“.
Ланц и Вајтфедер се соочуваат и со обвиненија за кршење на човековите права, поради тоа што посебно таргетирале црни деца и ги принудувале на работа поради расата, објавил споменатиот медиум. Одредена им е кауција од 500.000 долари.