Плажата Праса на грчкиот остров Кимолос е прогласена за плажа со најчиста вода во светот.
На крајот на 2023 година американската компанија „Florida Panhandle“ ја објави својата листа на плажи со најчиста вода во светот, а грчката Праса е на врвот.
Клучниот збор во овој избор го дале самите туристи. Прво била креирана листа од 50 плажи ширум светот кои биле највисоко рангирани на страниците со рецензии од патници. Потоа била пресметана оцена на секоја плажа врз основа на процентот на рецензии во кои се споменува „чиста вода“. Вкупно, тимот анализирал повеќе од 2,4 милиони рецензии за да ги избере најчистите.
Според вака обработените податоци, се покажало дека плажата Праса на Кимолос во Грција ја има најчистата вода во светот според оцените на патниците.
„Грчкото крајбрежје е најдолго во медитеранскиот басен, познато по кристално чистото море и богатата сина нијанса“, вели тимот во своите наоди. Затоа, не е ни чудо што повеќето од светските плажи со чиста вода се наоѓаат во Грција, на чело со плажата Праса на островот Кимолос, за која дури 43,56 отсто од јавно достапните рецензии на патници ја споменуваат фразата „чиста вода“, пренесува „Travel+Leisure“.
По плажата Праса, на второ место на листата на плажи со најчиста вода е уште едно грчко богатство - плажата Генади на островот Родос. Следува заливот Пилех на Тајланд, а повторно две грчки - плажата Агиос Димитриос е четврта, а плажата Агиа Ана на островот Наксос ја заокружува првата петорка.
