[ВИДЕО/ФОТО] Рама ги собра Албанците во Атина и вели дека „дошол да се бори!“ Им порачал дека тие се „еднакви газди во Грција“

Катемирини наведува дека овој собир бил одржан вчера во атинското предградие Галаци.

Се наведува дека собирот почнал веќе утринските часови, а дека Рама го рекламирал овој митинг на својот профил на Фејсбук.

Грчкиот весник наведува дека овој настан разгорува нови тензии во односите меѓу Грција и Албанија.

Се потсетува дека Рама пред собирот порачал дека „Грција е демократска земја“ која „не можела да спречи еден лидер да дојде во приватна посета и да им се обрати на сонародниците“.

„Ова привлече повеќе внимание од тоа што можеби требаше, но не во вистинско време непосредно пред изборите за Европскиот парламент“, порачал Рама пред митингот.

„Тирана пост“ наведува дека Рама на собирот на албанските мигранти во Атина рекол дека во грчката престолнина пристигнал за да се сретне со оние кои се „еднакви газди“ во таа земја, а не со поранешните слуги на Грција.

„Некој кажа дека не требаше да ви дојдам на посета, но тие можеби, откако ќе го видат ова искажување на семејна среќа, ќе разберат дека не дојдов да се состанам со нивните поранешни слуги. Дојдов да се бориме заедно со еднаквите газди на оваа куќа. Вие, Албанците од Грција, денес носите дополнителна вредност во работата, знаењето и културата на оваа благословена земја која пред 25 века била колевка на филозофијата и демократијата, а со која сме поврзани не само по тоа што сме соседи“, рекол Рама.

Тој го цитирал албанскиот писател Наим Фрашери кој во поема на грчки јазик порачал дека вистинската желба на Албанците е да живеат во мир и хармонија со своите соседи.

„Ние сакаме со нашите соседи, Словените и Грците, да живееме во хармонија, во ред и мир. Да не станеме непријатели и да се бориме, претрпевме доволно патење и тиранија“, рекол Рама.

Италијанската агенција наведува дека Рама со митингот во Атина ја започнал турнејата низ земјите во кои живеат негови сонародници.