Безвременската црна боја нема конкуренција меѓу боите, бидејќи е поим за елеганција, пристојност и класика. Тоа (речиси) секогаш поминува, особено кога се во прашање модните комбинации, но сè позастапена е и во ентериерите.
Особено ако сте љубители на индустрискиот стил на уредување, црната боја одлично ќе се вклопи во просторот, или само како акцент или како подоминантна боја. А еден таков стан во кој доминира црната боја нè освои со својата елеганција и совршена комбинација на рустикално и модерно.
Масивната црна кожна гарнитура е поставена пред црн ѕид со ефект на бетон, а тука е и црната маса која одлично одговара со средносветлиот паркет од даб. Дабот со рустикален изглед е идеален материјал и за кујната надополнета со работни површини од гранит.
За малку поиндустриски стил, тука е бетонската трпезариска маса надополнета со сиво-црни столчиња од материјал налик твид. Темниот ентериер дополнително е нагласен со детали како црна вазна и држач за свеќи, а за елегантниот впечаток придонесуваат и украсите од дрва.
Овој дом е совршен приказ на индустрискиот стил кој секогаш изгледа моќно, исто како што е случај со црната боја во ентериерот.
